कोण आहे 'मुच्छड पानवाला'? ड्रग्ज प्रकरणात हे नाव कसं आलं?

मुंबई: मागील काही दिवसांपासून गाजत असलेल्या मुंबईतील ड्रग्ज प्रकरणात बॉलिवूड सेलिब्रिटीनंतर आता शहरातील प्रसिद्ध ”चं नाव समोर आलं आहे. नार्कोटिक्स कंट्रोल ब्यूरो (एनसीबी)च्या पथकानं आज ‘मुच्छड पानवाला’चे सहसंस्थापक यांना अटकही केली आहे. त्यामुळं ‘मुच्छड पानवाला’ विषयी जोरदार चर्चा सुरू आहे. कोण आहे हा ‘मुच्छड पानवाला’? अमली पदार्थ प्रकरणाशी त्याचा संबंध काय? यावर एक नजर… (?)

‘मुच्छड पानवाला’ एक इंडस्ट्री

‘मुच्छड पानवाला’ हे एक टोपणनाव असलं तरी ते एका दुकानाचं नाव आहे. भरदार मिशा असलेल्या तिवारी बंधूंनी सुरू केलेल्या एका पानाच्या दुकानाचं नाव. हे दुकान पानाचं असलं तरी ते इतर पानाच्या ठेल्यांसारखं नाही. हे दुकान म्हणजे एक मोठा उद्योग आहे. मुंबईतील अत्यंत हायफाय समजल्या जाणाऱ्या ‘केम्प्स कॉर्नर’ भागात हे दुकान आहे. रामकुमार व जयशंकर तिवारी हे दोघे भाऊ ते चालवतात. या दोघांपैकी रामकुमार तिवारीला आज पोलिसांनी अटक केली आहे.

लाखोंची उलाढाल

१९७७ साली रामकुमार तिवारी हे मुंबईत आले आणि त्यांनी आपल्या वडिलांना पानाच्या धंद्यात मदत करायला सुरुवात केली. हळूहळू त्याचा व्यवसाय तेजीत आला. आपल्या रुबाबदार मिशांमुळं तिवारी हे अल्पावधीतच स्थानिक लोकांमध्ये लोकप्रिय झाले. त्यांचे ग्राहकही वाढू लागले आणि नफाही. आज ‘मुच्छड पानवाला’ रोजच्या रोज लाखोंची उलाढाल करतो.

बॉलिवूड सेलिब्रिटी, उद्योगपती ग्राहक

बॉलिवूडचे अनेक कलाकार, मोठमोठ उद्योजक आणि व्यापारी हे ‘मुच्छड पानवाला’चे ग्राहक आहेत. या दुकानातील पान खाण्यासाठी लोक रांगा लावतात. ‘मुच्छड’च्या ग्राहकांची संख्या इतकी मोठी आहे की तिवारी यांनी केवळ पान बनविण्यासाठी अनेक लोकांना कामाला ठेवलं आहे. शिवाय, त्यांचा भाऊ देखील या व्यवसायात त्यांना मदत करतो.

ऑनलाइन ऑर्डर आणि वेबसाइट

मुंबईत येणारे पर्यटकही ‘मुच्छड पानवाला’ला आवर्जून भेट देतात व पानाचा आस्वाद घेतात. ‘मुच्छड पानवाला’ची स्वत:ची वेबसाइट आहे. ऑनलाइन फूड पोर्टल्सकडून त्यांना ऑनलाइन ऑर्डर देखील येतात. तिवारी स्वत: मर्सिडीजनं फिरतात. मोठमोठे कार्यक्रम व सोहळ्याच्या प्रसंगीही ‘मुच्छड पानवाला’कडून पान पुरवले जाते.

ड्रग्ज प्रकरणात नाव कसं आलं?

एनसीबीने शनिवारी मुंबईतील खार व वांद्रे परिसरात छापे टाकून दोन दलाल बहिणींसह तिघांना ताब्यात घेतले होते. त्यात ब्रिटनमधील एका अनिवासी भारतीय नागरिकाचा समावेश होता. त्यांच्याकडून २०० किलो ड्रग्ज देखील जप्त करण्यात आले होते. या ब्रिटिश नागरिकाने लंडनहून मुंबईला अमली पदार्थ पुरवले होते. या तिघांच्या चौकशीतून ‘मुच्छड पानवाला’चे नाव पुढं आलं. या तिघांकडून ड्रग्ज घेऊन तो उच्चभ्रू ग्राहकांना पुरवत असल्याचा एनसीबीला संशय होता. या अनुषंगानं चौकशी केल्यानंतर त्याला अटक करण्यात आली आहे.

आणखी वाचा: