कोविड उपचारांमुळे केसगळती, पुटकुळ्या

मुंबई : कोविडनंतरच्या उपचारांदरम्यान रुग्णांच्या शरीरावर विविध प्रकारचे दुष्परिणाम होत असल्याचे दिसून येत आहेत. काही रुग्णांना तात्पुरत्या स्वरुपाची केसगळती होणे, तसेच चेहऱ्यावर पुटकुळ्या येण्याचा त्रास होत असल्याचे समोर आले आहे. करोना संसर्गाच्या काळामध्ये मानसिक ताण-तणाव वाढतो, स्टिरॉइड्सचा उपचार पद्धतीमध्ये केलेला वापर यांचाही एकत्रित परिणाम दिसून येतो. इंडियाना युनिव्हर्सिटी स्कूल ऑफ मेडिसिनने केलेल्या सर्वेक्षणानुसार, संसर्गजन्य आजाराची लागण झालेल्या रुग्णांमधील पहिल्या २५ लक्षणांमध्ये केसगळतीचा समावेश आहे.

ही केसगळती तात्पुरती असली, तरी ती चिंताजनक असू शकते. त्यासाठी योग्य पोषण घ्यायला हवे. विशेषत: जीवनसत्त्वे, मिनरल्स, आयर्न, कॅल्शिअम आणि प्रोटीन्सयुक्त आहार घ्यायला हवा. योग्य आहार घेतला न गेल्यास केसगळती बराच काळ राहू शकते. रुग्णांनी घाबरून जाऊ नये रोज किमान दोन ते तीन फळे, भाज्या, बाजरी, धान्य, शेंगा आणि योग्य फॅट्सचा तुमच्या आहारात समावेश करा, असा सल्ला वैद्यकीय तज्ज्ञांनी दिला आहे.

स्टिरॉइड्समुळे पुटकुळ्या

वैद्यकीय उपचारादरम्यान डॉक्टरांनी स्टिरॉईड्स दिले असतील, तर त्याच्या दुष्परिणामांमुळे पुटकुळ्या येतात. शरीराच्या तापमानामध्ये कमी-अधिक प्रमाणामध्ये वाढ होते. त्यामुळेही पुटकुळ्या दिसतात. रुग्णालयामध्ये असताना केस धुण्याचे प्रमाण कमी होते. त्यातून केसात कोंडा होतो, याकडे डर्मेटॉलॉजिस्ट डॉ. स्मृती नासवा यांनी लक्ष वेधले.