ट्रम्प यांचे काय होणार? कलम २५ नुसार कारवाई करण्याचा प्रस्ताव मंजूर

वॉशिंग्टन : आपल्या वादग्रस्त कारकीर्दीची अखेरही वादग्रस्तच करणारे अमेरिकेचे मावळते अध्यक्ष यांच्याविरोधातील महाभियोग प्रस्तावावरून राजकीय संघर्ष निर्माण झाला आहे. उपराष्ट्रपती माइक पेन्स यांनी ट्रम्प यांच्यावर संविधानातील २५ व्या कलमानुसार कारवाई करण्यास नकार दिला. त्यामुळे प्रतिनिधी सभागृहात उपराष्ट्रपती पेन्स यांनी कलम २५ नुसार ट्रम्प यांच्यावर कारवाई करावी यासाठी मतदान घेण्यात आले. सभागृहाने कारवाई करण्याच्या मागणीचा प्रस्ताव बहुमताने मंजुर केला आहे. या सभागृहात जो बायडेन यांच्या डेमोक्रॅटिक पक्षाचे वर्चस्व आहे.

उपराष्ट्रपती माइक पेन्स यांनी प्रतिनिधी सभागृहाच्या अध्यक्षा नॅन्सी पॅलोसी यांना पत्र लिहून कलम २५चा वापर करून ट्रम्प यांना पदावरून हटवण्यास नकार दिला. त्यानंतर सभागृहात डेमोक्रॅटीक पक्षाच्या सदस्यांनी उपराष्ट्रपतींनी कारवाई करावी यासाठीचा प्रस्ताव मांडला आणि त्यावर चर्चा सुरू झाली. बहुतांशी रिपब्लिकन सदस्यांनी ट्रम्प यांच्यावरील महाभियोगाच्या प्रस्तावाला विरोध केला आहे.

वाचा:

याआधी महाभियोगाचा प्रस्ताव सोमवारी सभागृहात मांडण्यात आला होता. विद्यमान राष्ट्राध्यक्ष डोनाल्ड ट्रम्प यांनी अमेरिकेच्या संसदेवर हल्ला करण्यासाठी आपल्या समर्थकांना चिथावणी दिली असल्याचा आरोप त्यांच्यावर ठेवण्यात आला आहे. डेमोक्रॅटीक पक्षाचे सदस्य जॅमी रस्किन, डेव्हिड सिसिलीन आणि टेड ल्यूकर यांनी महाभियोगाचा प्रस्ताव सभागृहात मांडला. या प्रस्तावाला २११ सदस्यांनी पाठिंबा दिला. या प्रस्तावानुसार मावळत्या राष्ट्राध्यक्षांनी देशद्रोही कारवायांसाठी चिथावणी दिली असल्याचे म्हटले आहे. ट्रम्प यांनी आपल्या समर्थकांना कॅपिटल हिलला (अमेरिका संसद) घेराव घालण्यासाठी चिथावणी दिली. त्यावेळी संसदेत इलेक्टोरल मतांची मोजणी सुरू होती. त्यावेळीच जमावाने संसदेत घुसखोरी करत गोंधळ घातला. त्यामुळे मतमोजणीची प्रक्रिया थांबवावी लागली. ट्रम्प समर्थकांच्या हिंसाचारात एका पोलीस अधिकाऱ्यासह पाचजणांचा मृत्यू झाला.

वाचा:

दरम्यान, ट्रम्प यांच्यावर महाभियोगाची कारवाई करण्याची मागणी डेमोक्रॅटिक पक्षाने लावून धरली होती. अमेरिकी प्रतिनिधिगृहाच्या सभापती नॅन्सी पॅलोसी यांनी डेमोक्रॅटिक सदस्यांना पत्र लिहले होते. उपाध्यक्ष माइक पेन्स यांनी २५व्या घटनादुरुस्तीने दिलेल्या अधिकारांचा वापर करून, अध्यक्ष ट्रम्प यांना पदावरून हटवण्याच्या मागणीवर पॅलोसी यांनी या पत्रात भर दिला होता.

ट्रम्प-पेन्स यांची चर्चा

ट्रम्प आणि उपाध्यक्ष माइक पेन्स यांनी सोमवारी सायंकाळी व्हाइट हाउसच्या ओव्हल ऑफिसमध्ये चर्चा केली. कॅपिटॉल इमारतीवरील हल्ल्यानंतर आठवडाभराच्या तणावपूर्ण घडामोडी, एकमेकांवर आरोप-प्रत्यारोपानंतर दोन्ही नेते प्रथमच भेटले. ट्रम्प यांच्या अध्यक्षपदाचे नऊ दिवस राहिलेले असताना, उपाध्यक्ष पेन्स २५व्या घटनादुरुस्तीचा वापर करून ट्रम्प यांना हटवण्याचे प्रयत्न करणार नसल्याचे संकेत मिळाले होते.