म. टा. विशेष प्रतिनिधी

मुंबई : कचराच तो, त्याला काय किंमत म्हणण्याचे दिवस कधीच सरले. आता कचऱ्यालाही सोन्याचे मोल आले आहे. परिसरात निर्माण होणारा कचरा वाहून नेण्यासाठी कितीची बोली लागली असावी, काही अंदाज करता येईल? ६०० मेट्रिक टन कचरा उचलण्यासाठी दोन वर्षांसाठी थोडेथोडके नव्हे तब्बल नऊ कोटी रुपयांचे कंत्राट दिले जाणार आहे.

मुंबईत दोन ते तीन वर्षांपूर्वी दररोज आठ ते नऊ हजार मेट्रिक टन कचरा निर्माण होत होता. पालिकेने केलेल्या उपाययोजनांनंतर आता हे प्रमाण सहा हजार मेट्रिक टनपर्यंत खाली आले आहे. पूर्वी सर्व कचरा देवनार व मुलुंड डम्पिंग ग्राऊंडवर टाकण्यात येत असे. या डम्पिंग ग्राऊंडची क्षमता संपल्याने सर्वाधिक साडेपाच ते पाच हजार मेट्रिक टन कांजुरमध्ये तर एक ते दीड हजार मेट्रिक टन कचरा देवनारमध्ये टाकला जातो. मुंबईतील एकूण कचऱ्यापैकी दहा टक्के म्हणजे सुमारे ६०० मेट्रिक टन कचरा कुर्ल्यामधून गोळा होतो.

हा कचरा वाहनाने उचलून देवनार डम्पिंग ग्राउंडवर टाकण्यात येतो. हा कचरा उचलण्याचे कंत्राट ज्या कंत्राटदाराला दिले होते, त्याची मुदत ३१ डिसेंबर, २०२० रोजी संपुष्टात आली. त्यामुळे पालिकेने नवीन नियुक्तीसाठी निविदा मागवल्या. त्यामध्ये नऊ कंत्राटदारांनी भाग घेतला. त्यात पात्र ठरली आहे. याबाबतचा प्रस्ताव लवकरच मंजुरीसाठी स्थायी समितीच्या बैठकीत येणार आहे. मात्र प्रस्ताव मंजूर होऊन काम सुरू होण्यास वेळ लागणार असल्याने आयुक्त इक्बालसिंह चहल यांनी आपल्या अधिकारात या कंत्राटदाराला काम दिले आहे.

१ लाख २३ हजार रुपये दर

पहिल्या टप्प्यात तात्पुरते म्हणजे ४२ दिवसांसाठी प्रति मेट्रिक टन कचरा उचलण्यासाठी १९८ रुपये दराने कंत्राट दिले आहे. ६०० मेट्रिक टनासाठी १ लाख १८ हजार ८०० रुपये याप्रमाणे ४२ दिवसांसाठी कंत्राटदाराला ४९ लाख ८९ हजार ६०० रुपये देण्यात येणार आहेत. याच कंत्राटदाराला पुढे कुर्ला येथे दररोज निर्माण होणारा ६०० मेट्रिक टन कचरा उचलण्यासाठी १ लाख २३ हजार ५५२ रुपये प्रति मेट्रिक टन या दराने दोन वर्षांसाठी ९ कोटी १ लाख ९२ हजार ९६० रुपये देण्यात येणार आहेत.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here