धनंजय मुंडे यांच्यावर होणाऱ्या आरोपांनंतर राज्यात राजकारण रंगलं आहे. भारतीय जनता पक्षानं याच मुद्द्यावरुन आता राष्ट्रवादी काँग्रेसला घेरलं आहे. तर, मुंडे यांच्या राजीनाम्याची मागणीही जोर धरु लागली आहे. या आरोपांनंतर धनंजय मुंडे यांनीही राजीनामा देण्याचा निर्णय घेतला असल्याची चर्चा असतानाच शरद पवार यांनी यावर स्पष्टीकरण दिलं आहे.
‘धनंजय मुंडे काल मला भेटले. मला भेटून त्यांनी आरोपांची सविस्तर माहिती दिली. प्रकरणात त्यांच्यावर व्यक्तिगत हल्ले होतील यांचा अंदाज त्यांना होताच म्हणून ते याविरोधात हायकोर्टात गेले. त्यांनी आदेश प्राप्त करुन घेतला होता. त्यामुळे त्याच्यावर आणखी भाष्य करण्याची गरज नाही,’ असं शरद पवारांनी म्हटलं आहे.
‘माझ्या मते आरोपांचं स्वरुप गंभीर आहे. यावर पक्ष म्हणून विचार करावा लागेल,’ असं नमूद करतानाच ‘धनंजय मुंडे यांनी मला सांगितलेली माहिती पक्षातील इतर सहकाऱ्यांना देणं हे माझं कर्तव्य आहे. याबाबत पक्षातील इतर सहकाऱ्यांशी चर्चा करु आणि पक्ष म्हणून निर्णय घेऊ. याला जास्त वेळ लागेल, असं वाटत नाही. कोर्टातील गोष्टींमध्ये मी पडत नाही, पण पक्षप्रमुख म्हणून जे काही निर्णय घ्यावे लागलीत ते तातडीने घेऊ, असं पवार म्हणाले आहेत.
धनंजय मुंडे यांच्या प्रकरणावर मुख्यमंत्र्यांशी चर्चा झाली का?, या प्रश्नावर शरद पवार यांनी सावध प्रतिक्रिया दिली आहे. ‘त्याआधी पक्षातील इतर सहकाऱ्याशी चर्चा करुन निर्णय होऊदेत. त्यासाठी मुख्यमंत्र्यांची वाट बघण्याची गरज नाही,’ असं पवार म्हणाले आहेत.
नवाब मलिकांवर व्यक्तिगत आरोप नाहीः पवार
यांच्यावर व्यक्तिगत आरोप नाही, आरोप त्यांच्या जावयांवर आहे. अटकही झाली असून तपास यंत्रणेला सहकार्य करणं आणि वस्तुस्थिती समोर आणणं गरजेचं आहे. तपास यंत्रणा त्या पद्धतीने काम करेल अशी अपेक्षा आहे. त्यांना संबंधितांकडून सहकार्य होईल याची खात्री आहे. गेली अनेक वर्ष नवाब मलिक राजकारणात आहेत. पण त्यांच्यावर कधीच आरोप झालेला नाही, असंही पवारांनी स्पष्ट केलं आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
