कांदिवली पश्चिमेकडील डहाणूकर वाडीमध्ये मकर संक्रात असल्याने मोठ्या प्रमाणात पतंग उडविले जात होते. काटाकाटीमध्ये कापलेल्या पतंगांना पकडण्यासाठी लहान मुले पळत होती. त्यांच्यासोबत दुर्गेश जाधव हा देखील पळत होता. दुपारी ३ च्या सुमारास येथून जवळच असलेल्या एका तबेल्याजवळ एक पतंग पडताना दुर्गेशने पाहिले. हा पतंग पकडण्यासाठी धावत असताना तबेल्याबाहेर शेण टाकण्यासाठी खोदण्यात आलेल्या खड्डयात दुर्गेश पडला. खड्ड्यात शेण भरलेले असल्याने त्याला प्रयत्न करूनही बाहेर पडता आले नाही. शेणात गुदमरल्याने त्याचा मृत्यू झाला. बराच उशीर दुर्गेश दिसत नसल्याने शोधाशोध केली त्यावेळी हा प्रकार लक्षात आला. याप्रकरणात कांदिवली पोलिसांनी तबेल्यावाल्यांना चौकशीसाठी ताब्यात घेतले आहे. त्यांचा निष्काळजीपणा पुढे आल्यास कारवाई केली जाईल, असे पोलिसांनी म्हटले आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
