इंडोनेशियाच्या अधिकाऱ्यांनी सांगितले की, ६०० जण जखमी झाले आहेत. भूकंपामुळे नुकसान झालेल्या भागाचा आढावा घेतला जात आहे. जखमींची आणि मृतांची संख्या वाढण्याची भीती असल्याचे अधिकाऱ्यांनी सांगितले. मदत आणि बचाव कार्य जोमाने सुरू असून कोसळलेल्या घराच्या ढिगाऱ्यातून नागरिकांना वाचवण्याचे प्रयत्न सुरू आहेत. या भूकंपात एका रुग्णालयाचा काही भाग कोसळला आहे. त्यामुळे तंबू उभारून नागरिकांवर उपचार सुरू आहेत. जवळपास दोन हजार नागरिकांना सुरक्षित स्थळी नेण्यात आले आहे.
वाचा:
या भूकंपाचे केंद्र पश्चिम सुलावेसी प्रातांतील मामुजु जिल्ह्यात जमिनीखाली १८ किमी खोल अंतरावर होते. या भागात समुद्रात ५.९ रिश्टर स्केल क्षमतेचा भूकंप आला होता. शुक्रवारी आलेल्या भूकंपात जवळपास ३०० घरांचे नुकसान झाले आहे. काही ठिकाणी भूकंपाचे आफ्टरशॉक्सही जाणवण्याची भीती आहे. अनेक ठिकाणी वीज पुरवठाही खंडीत झाला असल्याची माहिती समोर आली आहे.
वाचा:
काही दिवसांपूर्वीच इंडोनेशियात एक प्रवासी विमान समुद्रात कोसळले होते. या अपघातात कर्मचारी व प्रवाशांसह ६२ जण ठार झाल्याचा अंदाज व्यक्त करण्यात येत आहे. नौदलाच्या शोधपथकास श्रीविजया विमानाचा ब्लॅक बॉक्स सापडला आहे. ६२ प्रवाशांसह जकार्ताहून निघालेल्या या विमानाचा जावा समुद्रात शनिवारी अपघात झाला होता. ब्लॅक बॉक्स सापडल्याने बोइंग ७३७-५०० या विमानाच्या अपघाताचे कारण शोधण्यास मदत होणार आहे. राष्ट्रीय वाहतूक सुरक्षा समितीकडे सापडलेले साहित्य सोपविण्यात आले आहे. त्यात विमानाची कागदपत्रे आहेत, की ते कॉकपिट व्हॉइस रेकॉर्डर आहे, याचा तपास सुरू आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
