नवी दिल्लीः सोशल मीडियावर मुलीसोबत प्रेम करणे एका तरुणाला चांगलेच महागात पडले. लग्नानंतर पती-पत्नीमध्ये भांडण झाल्यानंतर पत्नीने कराटेची धमकी देणे सुरू केले. शनिवारी या दोघां पती-पत्नीत भांडण झाल्यानंतर पत्नीने किक मारली. यात नवऱ्याच्या पायाचे हाड मोडले असून त्याला हॉस्पिटलमध्ये दाखल करण्यात आले आहे. दिल्ली-एनसीआरच्या नोएडात ही घटना उघडकीस आली आहे.

महिलांना कौटुंबिक हिंसाचाराला बळी पडू नये यासाठी देशात कडक कायदा करण्यात आला आहे. परंतु, काही ठिकाणी पत्नीकडून पतीला हिंसाचाराला बळी पडावे लागते. सेक्टर १९ मधील तरुण आपल्या कुटुंबासोबत राहतो. त्याची पत्नी कराटे चॅम्पियन आहे. या दोघांची ओळख सोशल मीडियावर झाली. त्यानंतर दोघांनी लग्न केले. लग्नानंतर तरुणीला कराटेच्या सरावासाठी जायला जमत नव्हते. रविवारी सकाळी पतीने पत्नीला घरीच सराव करण्यास सांगितले. तिला मदत करण्यासाठी पती पोहोचला परंतु, पत्नीची एक किक जोरात बसल्याने पतीच्या पायाचे हाड फ्रॅक्चर झाले आहे. जखमी झाल्यानंतर पत्नीने पतीला जिल्हा हॉस्पिटलमध्ये दाखल केले. त्या ठिकाणी उपचार करण्यात आल्यानंतर हॉस्पिटलमधून डिस्चार्ज देण्यता आला आहे.

परंतु, तरुणाच्या वडिलांनी सूनेवर मारहाणीचा आरोप केला आहे. अशोक साहनी (तरुणाचे वडील) यांनी सांगितले मे २०१९ रोजी दोघांचा विवाह करण्यात आला. तेव्हापासून या दोघांमध्ये नेहमीच भांडण होत आहे. सून नेहमी माझ्या मुलाला मारहाण करते, असा आरोप मुलीच्या सासऱ्यांनी केला आहे. मुलाला याआधीही पत्नीने मारहाण केली असून त्यावेळी त्याच्या डोक्याला गंभीर दुखापत झाली होती. या घटनेनंतर पोलिसांकडे तक्रार सुद्धा दाखल केली होती, असे तरूणाचा वडिलांनी सांगितले आहे.