ब्रिस्बेन, : ऑस्ट्रेलियाविरुद्ध सुरू असलेल्या कसोटी मालिकेदरम्यान भारतीय संघ दुखापतींनी ग्रासलेला असताना आगामी इंग्लंडविरुद्धच्या मालिकेसाठी गोलंदाजांची निवड तरी कशी करायची असा प्रश्न राष्ट्रीय निवड समितीसमोर असेल. शिवाय, या दुखापतींमुळे टीम इंडियाच्या ट्रेनर आणि फिजिओ यांच्यावर असलेल्या कामाच्या ओझ्याचीही चर्चा सुरू झाली आहे. शुक्रवारी भारताचा वेगवान गोलंदाज नवदीप सैनी दुखापतग्रस्त झाल्यानंतर भारतीय संघापुढील चिंता आणखी वाढली. आधीच मोहम्मद शमी, इशांत शर्मा, जसप्रीत बुमराह, अश्विन असे सगळे गोलंदाज एकापाठोपाठ एक दुखापतग्रस्त झाल्यानंतर भारतापुढे कमी पर्याय शिल्लक राहिले आहेत.

भारत आणि ऑस्ट्रेलिया संघातील गोलंदाजांची तुलना केली तर भारतीय गोलंदाज नेमके कशामुळे इतक्या मोठ्या प्रमाणात दुखापतग्रस्त झाले हा प्रश्न उपस्थित होत आहे. ऑस्ट्रेलियाचे चार गोलंदाज जोश हेझलवूड (९८ षटके), पॅट कमिन्स (१११.१ षटके), मिचेल स्टार्क (९८ षटके) आणि नॅथन लायन (१२८ षटके) यांनी एकूण ४३५.१ षटके गोलंदाजी केली आहे. ही गेल्या तीन सामन्यांतील त्यांच्या षटकांची संख्या आहे. मात्र त्यातील कुणीही दुखापतग्रस्त झालेला नाही. उलट चौथ्या आणि अखेरच्या कसोटीतही ते खेळत आहेत. पण भारतीय गोलंदाजांवर नजर टाकली तर रवीचंद्रन अश्विन (१३४.१ षटके), जसप्रीत बुमराह (११७.४ षटके), रवींद्र जाडेजा (३७.३ षटके), उमेश यादव (३९.४ षटके), नवदीप सैनी (२९ षटके) व मोहम्मद सिराज (८६ षटके) यांनी मिळून एकूण ४४२ षटके गोलंदाजी केली आहे. यातील पाच जण दुखापती किंवा तंदुरुस्तीच्या समस्येमुळे स्पर्धेबाहेर फेकले गेले आहेत. पण तंदुरुस्तीचा मुद्दा विचारात घेता उमेश यादव अवघ्या दोन कसोटीत दोन डावांपेक्षा कमी खेळूनही दुखापतग्रस्त झाला तर सैनीने त्यापेक्षा कमी षटके गोलंदाजी केली आहे.

अश्विनने सर्वाधिक षटके गोलंदाजी केली आहे. पण तंदुरुस्तीच्या कारणास्तव त्याला गेल्या काही मालिकात वगळण्यात आले आहे किंवा तो संपूर्ण मालिकेत खेळलेला नाही. यामुळे संघाचे फिजिओ नितीन पटेल, त्यांचे सहकारी योगेश परमार, शारीरिक तंदुरुस्तीवर लक्ष ठेवणारे निक वेब व शुम देसाई यांच्या कामगिरीवर प्रश्नचिन्ह उपस्थित होत आहे. हनुमा विहारीला नुकतीच दुखापत झाली. ही तंदुरुस्तीशी संबंधित समस्या होती. दुखापत होऊनही तो बराच काळ खेळपट्टीवर उभा राहिला.

शमी, बुमराह आणि जाडेजा यांना अतिरिक्त ताणामुळे बाहेर पडावे लागले. पण उमेश यादव, सैनी हे फार क्रिकेट न खेळताही दुखापतग्रस्त का झाले, हा प्रश्न विचारला जात आहे.
इंग्लंडच्या आगामी भारत दौऱ्यात भारतीय खेळाडूंना चेन्नईत २७ जानेवारीपासून सुरक्षित वातावरणात राहायचे आहे. त्यामुळे केवळ १२ दिवसांचा अवधी भारतीय संघासाठी शिल्लक आहे. या कालावधीत चेतन शर्मा, सुनील जोशी यांच्या निवड समितीला नव्या गोलंदाजांचा शोध घ्यावा लागणार आहे. इशांत शर्मा सध्या खेळतो आहे. भुवनेश्वरही आहे. पण तो कसोटी क्रिकेट बऱ्याच दिवसांत खेळलेला नाही.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here