LIVE अपडेट :
– आत्तापर्यंत ‘ट्रॅक्टर रॅली’त सहभागी होण्यासाठी हजारो शेतकऱ्यांनी दिल्लीच्या सीमेत प्रवेश केला आहे
– एकीकडे राजपथावर परेड सुरू असताना दुसरीकडे राजधानी दिल्लीच्या सीमेवर शेतकरी आणि पोलीस आमने-सामने आलेले दिसत आहेत. गर्दी पांगवण्यासाठी पोलिसांना अश्रूधुराचा वापरही करावा लागला.
– नोएडाच्या चिल्ला बॉर्डरवर स्टंट दरम्यान एक ट्रॅक्टर पलटल्यानं दोन जण गंभीर जखमी झाले आहेत. त्यानंतर आंदोलकांनी एकत्र येत हा ट्रॅक्टर पुन्हा सरळ उभा केला.
– ट्रॅक्टर रॅली निघण्यापूर्वीच सिंघू सीमेवर शेतकऱ्यांनी पोलिसांनी उभारलेले बॅरिकडेस् तोडल्याचं समजतंय. पन्नू समूहाच्या जवळपास ५००० शेतकऱ्यांनी आउटर रिंग रोडवर ट्रॅक्टर रॅली काढणार असल्याचं म्हटलं होतं.
– राजधानीकडे निघालेल्या वाहनांना रोखण्यासाठी करनाल बायपासवर मंगळवारी एका रात्रीतच एक भली मोठी तात्पुरती भिंत उभारण्यात आलीय.
– दिल्लीच्या वेगवेगळ्या सीमांवर सकाळपासूनच शेतकरी मोठ्या संख्येत आपापल्या ट्रॅक्टरसहीत राजधानीकडे कूच करत असलेले दिसून येत आहेत. ‘ट्रॅक्टर रॅली’त सहभागी होण्यासाठी हे दिल्लीत दाखल होत आहेत.
सोमवारी, किसान मजूर संघर्ष समितीनं मात्र एक वेगळीच घोषणा केलीय. संयुक्त किसान मोर्च आणि पोलिसांद्वारे निश्चित करण्यात आलेल्या ट्रॅक्टर परेड मार्गावर आपण सहमत नसल्याचं या संघटनेनं म्हटलंय. आपण दिल्लीच्या रिंग रोडवरही जाणार असल्याचं जाहीर करण्ययात आलंय. त्यामुळे वाद उद्भवण्याची शक्यता वर्तवण्यात येतेय.
पोलिसांकडून शेतकरी संघटनांशी झालेल्या अनेक बैठकांनंतर सीमेवर तीन ठिकाणी मार्ग बंद करण्यात आले आहेत. दिल्ली पोलिसांकडून वाहतुकीसंदर्भात सविस्तर मार्गदर्शक सूचना जारी करण्यात आलीय. यात वाहनचालकांना नॅशनल हायवे ४४, सिंघू तसंच टिकरी सीमा भागापासून लांब राहण्याचा प्रयत्न करण्याची सूचना करण्यात आलीय. गाझीपूर सीमा, राष्ट्रीय महामार्ग २४, रस्ता क्रमांक ५६ आणि अप्सरा सीमेवर जाणाऱ्या रस्तेही टाळावेत, असा सल्ला पोलिसांकडून देण्यात आला आहे.
दिल्ली पोलिसांसमोर अशी स्थिती कदाचित पहिल्यांदाच समोर येत असावी. त्यामुळेच, परेड संपल्यानंतरही दिल्ली पोलिसांना अधिक सतर्क राहावं लागणार आहे. राजपथावरची परेड संपुष्टात आल्यानंतरही पोलीस संपूर्ण तैनातीसह कोणत्याही प्रकारचा अनुचित प्रकार टाळण्यासाठी रस्त्यांवर सज्ज राहणार आहेत.
शेतकरी संघटनांची ट्रॅक्टर रॅली दुपारी सुरू होऊन सायंकाळी उशिरापर्यंत सुरू राहणार असल्याचं दिसतंय.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
