LIVE ठळ्ळक घडामोडी :
– दुर्घटना घडली त्यावेळी जवळपास १०० मजूर, कामगार घटनास्थळीच होते. त्यापैंकी नऊ जणांचे मृतदेह हाती लागले आहेत, अशी माहिती आयटीबीपीचे महासंचालक एस एस बी देसवाल यांनी दिलीय. बेपत्ता असलेल्या मजुरांचा शोध सुरू असल्याचंही त्यांनी म्हटलंय.
– उत्तराखंडात हिमनदी कोसळून भयंकर दुर्घटना घडलीय. पीडितांच्या कुटुंबीयासमवेत आमच्या संवेदना आहेत. अलकनंदा ही गंगेची उपनदी आहे आणि गंगा उत्तर प्रदेशात सुमारे १००० किलोमीटरचा प्रवास करते. आम्ही आमच्या जलशक्ती विभागाला सतर्कतेचे आदेश दिले आहेत : उत्तर प्रदेशचे मुख्यमंत्री योगी आदित्यनाथ
– उत्तराखंडमध्ये तपोवन भागाजवळ हिमस्खलनामुळे निर्माणाधीन जलविद्युत प्रकल्पाच्या थोड्या भागाला नुकसान झालंय. जिल्हा प्रशासन आणि पोलिसांच्या मदतीनं परिस्थितीवर सातत्यानं नियंत्रण ठेवलं जातंय : एनटीपीसी लिमिटेड
– उत्तराखंडचे मुख्यमंत्री त्रिवेंद्र सिंह रावत चमोलीमध्ये तपोवन भागाजवळ रेणी गावात दाखल झाले आहेत. ते परिस्थितीचा आढावा घेत आहेत.
– आयटीबीपीच्या जवानांकडून तपोवन सुरुंग उघडण्यासाठी खोदकाम सुरू आहे. मलब्यामुळे या सुरुंगाचा दरवाजा बंद झालाय. या मलब्याखाली अनेक जण अडकल्याची शक्यता व्यक्त करण्यात येतेय.
– खबरदारीचा उपाय म्हणून ऋषिकेश – बद्रीनाथ राष्ट्रीय महामार्गावरची वाहतूक बंद करण्यात आलीय.
– आसामच्या दौऱ्यावर असणाऱ्या पंतप्रधान नरेंद्र मोदी यांनी उत्तराखंड दुर्घटनेबाबत मुख्यमंत्री त्रिवेंद्र सिंह रावत यांच्याशी संपर्क साधला आणि चर्चा केली. पंतप्रधानांनी मुख्यमंत्र्यांना हरएक प्रकारे मदतीचं आश्वासन दिलंय
– चमोलीमध्ये हिमकडा कोसळल्यानंतर सुरू झालेला पाण्याचा प्रवाह नंदप्रयागपर्यंत पोहचलाय. दिलासादायक गोष्ट म्हणजे, नंदप्रयाग जवळ पोहचता-पोहचता या पाण्याच्या प्रवाहाचा वेग सामान्य झालाय
– हिमकडा कोसळल्यानंतर चमोली जिल्ह्यात आलेल्या पुरात १००-१५० जणांना फटका बसल्याची शक्यता असल्याचं उत्तराखंडाचे मुख्य सचिव ओम प्रकाश यांनी म्हटलंय.
– उत्तराखंडातील जोशीमठाजवळ हिमकडा कोसळल्यानंतर मदतीसाठी हेल्पलाईन क्रमांक जारी करण्यात आला आहे. १०७० किंवा ९५५७४४४४८६ या क्रमांकावर नागरिक मदत मिळवण्यासाठी संपर्क साधू शकतात
– मी स्वत: घटनास्थळी दाखल होत आहे, कृपया अफवा पसरवू नका : मुख्यमंत्री त्रिवेंद्र सिंह रावत यांचं आवाहन
– आयटीबीपीच्या दोन टीम्स घटनास्थळी दाखल झाल्या आहेत. एनडीआरएफच्या तीन टीमला देहरादूनहून घटनास्थळी धाडण्यात आलंय. तसंच आणखीन तीन टीम्स सायंकाळपर्यंत हवाईदलाच्या हेलिकॉप्टर्सच्या मदतीनं घटनास्थळी पोहचवली जाणार आहेत.
– आयटीबीपीचे १०० हून अधिक जवान तातडीनं बचाव कार्यासाठी घटनास्थळी दाखल झाले आहेत. मदत आणि बचाव कार्यासाठी देहरादूनमधून टीम्स धाडण्यात आल्या आहेत.
– एसडीआरएफ आणि स्थानिक प्रशासनही घटनास्थळी मदत उपलब्ध करून देण्याचे प्रयत्न करत आहेत. जिल्हाधिकारी आणि पोलिस अधीक्षक घटनास्थळाकडे रवाना झाले आहेत : नित्यानंद राय, केंद्रीय गृह राज्यमंत्री
– प्रशासनाकडून चमोली, देवप्रयाग, कर्णप्रयाग आणि श्रीनगरमध्ये लोकांना सतर्क राहण्याचे आदेश दिले आहेत.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
