मनी लाॅंडरिंग प्रकरणी आज विशेष न्यायालयात सुनावणी झाली. यात न्यायालयाने कोचर यांना पाच लाख रुपयांच्या बॉण्डवर जामीन मंजूर केला. तसेच देश सोडून जाऊ नये, अशी अट त्यांना घालण्यात आली आहे. मनी लाॅंडरिंग प्रतिबंधात्मक कायदयाशी संबंधित विशेष न्यायालयाने ३० जानेवारी रोजी चंदा कोचर , त्यांचे पती दीपक कोचर आणि व्हिडिओकाॅन समूहाचे संचालक वेणुगोपाल धूत यांना समन्स बजावले होते.
आयसीआयसीआय बँकेने व्हिडीओकॉनसंबंधी दिलेल्या कर्जघोटाळ्यात ईडीने आरोपपत्र दाखल केले आहे. बँकेच्या माजी व्यवस्थापकीय संचालक व सीईओ चंदा कोचर, त्यांचे पती दीपक कोचर, तसेच माजी खासदार वेणुगोपाळ धूत यांचेही या आरोपपत्रात नाव आहे.
दीपक कोचर हे व्हिडीओकॉनची उपकंपनी असलेल्या नू पॉवर या कंपनीचे संचालक होते. ही कंपनी केवळ कागदोपत्री होती. आयसीआयसीआय बँकेच्या सीईओ चंदा कोचर यांनी पदाचा गैरवापर करीत बँकेद्वारे नू पॉवर कंपनीला तब्बल १८७५ कोटी रुपयांचे कर्ज दिले. ते कर्ज पुढे बुडित खात्यात गेले. या प्रकरणी अंमलबजावणी संचालनालयाने (ईडी) २०१७ ते २०१८ डिसेंबरदरम्यान चौकशी केली होती. यामुळेच चंदा कोचर यांनाही बँकेच्या पदावरून पायउतार व्हावे लागले होते. त्यानंतर दोनच महिन्यांपूर्वी ईडीने दीपक व चंदा कोचर यांच्या घरावर छापा टाकत दीपक कोचर यांना अटक केली होती. त्यानंतर आता या तिघांविरुद्ध मनी लॉन्डरिंग कायद्यांतर्गत आरोपपत्र दाखल करण्यात आले आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
