४५ दिवसांनंतर कामगार अधिकार कार्यकर्ती नोदीप कौरची तुरुंगातून सुटका

नवी दिल्ली : कामगार हक्क कार्यकर्ती हिला अखेर शुक्रवारी जामीन मंजूर करण्यात आलाय. गेल्या १२ जानेवारीपासून नोदीप कौर तुरुंगात बंद होती. हरयाणात मजुरांसाठी काम करणाऱ्या, त्यांच्या हक्कांसाठी लढणाऱ्या नोदीप कौर हिच्याविरुद्ध शेतकरी आंदोलनादरम्यान झालेल्या हिंसाचारात सहभागी होण्याचा आरोप ठेवण्यात आला होता. तीन प्रकरणांत जामीन मिळाल्यानंतर शुक्रवारी तिची करनाल तुरुंगातून सुटका करण्यात आली. तुरुंगातून सुटकेनंतर आपण सिंघू सीमेवर शेतकरी आंदोलकांना पाठिंबा देणार असल्याचं नोदीप कौर हिनं म्हटलंय.

नोदीपची अटक बेकायदेशीर?

दिल्ली-हरयाणाच्या सीमेवर कुंडलीमध्ये कामगारांच्या एका आंदोलनात सहभागी झालेल्या नोदीप कौर हिला १२ जानेवारी रोजी अटक करण्यात आली होती. हे आंदोलन त्याच वेळी सुरू होतं जेव्हा तीन नव्या केंद्रीय कृषी कायद्यांविरोधात शेतकऱ्यांचं आंदोलन सुरू होतं. यातील पंजाब-हरयाणातून सीमेवर दाखल झालेल्या शेतकऱ्यांपैंकी अनेकांनी कुंडलीतही ठाण मांडलं होतं.

शेतकरी आंदोलनाला पाठिंबा देणाऱ्या दलित तरुणी नोदीप कौर हिला प्रशासनाकडून निशाणा बनवण्यात आल्याचा आरोप समर्थकांकडून करण्यात येतोय. नोदीप कौर हिच्यावर हत्येचा प्रयत्नाचा गुन्हा दाखल करण्यात आला होता. शिवाय खंडणी, चोरी, दंगल भडकावणं, बेकायदेशीर जमावात सहभाग घेणं तसंच धमकीचा आरोप होता.

नोदीप कौर ही मूळची पंजाबच्या मुक्तसरची रहिवासी आहे. ती सोनीपतच्या कुंडलीच्या औद्योगिक क्षेत्रातील एका कंपनीत काम करते. तीचं कार्यालय दिल्ली-हरयाणा सीमेवरून (शेतकरी आंदोलनाच्या स्थळापासून) केवळ तीन किलोमीटर अंतरावर आहे. नोदीपसोबतच तिचा सहकारी शिवकुमार यालाही अटक करण्यात आली होती. नोदीपला खंडणी आणि धमकीच्या दोन प्रकरणांत जामीन मंजूर करण्यात आलाय.

पोलिसांवर गंभीर आरोप
दुसरीकडे नोदीप कौर हिच्याकडूनही पोलिसांवर गंभीर आरोप करण्यात आले आहेत. आपली मेडिकल चाचणी करण्यात आली नाही, ही फौजदारी प्रक्रिया कायद्याच्या कलम ५४ चं उल्लंघन आहे, असंही नोदीपचं म्हणणं आहे. पोलीस स्टेशनमध्ये नोदीपला पुरुष पोलिसांकडूनही मारहाण करण्यात आल्याचा तसंच लैंगिक छळ करण्यात आल्याचाही आरोप नोदीप कौर हिच्या बहिणीकडून करण्यात आला आहे. नोदीपच्या खासगी अंगावर जखमांच्या खुणा आहेत, याविरुद्ध कारवाई केली जावी, अशी मागणी तिच्या बहिणीनं केलीय.

पोलिसांचं स्पष्टीकरण

पोलिसांनी मात्र नोदीपच्या आरोपांना फेटाळून लावलंय. नोदीप कौर हिनं केलेल्या हल्ल्यात तीन पोलीस कर्मचारी जखमी झाले होते. यामध्ये एका महिला कॉन्स्टेबलचाही समावेश होता, असं पोलिसांनी म्हटलंय. ८ फेब्रुवारी रोजी पंजाब राज्य अनुसूचित जाती आयोगानं अतिरिक्त मुख्य सचिवांकडे (गृह) नोदीप कौर हिला दिलासा देण्याची सूचना केली होती. तसंच नोदीप कौर हिच्या कथित बेकायदा अटकेची दखल घेत पंजाब आणि हरियाणा उच्च न्यायालयानं हरियाणा सरकारला नोटीस बजावली होती.

मीना हॅरिस यांच्या ‘त्या’ ट्विटनंतर नोदीप कौरच्या अटकेवर लक्ष

६ फेब्रुवारी रोजी मीना हॅरिस यांनी केलेल्या ट्विटनंतर नोदीप कौर चर्चेत आली होती. ‘२३ वर्षीय कामगार अधिकार कार्यकर्ती नोदीप कौर हिला अटक करण्यात आलीय. तिचा छळ करण्यात आला आणि पोलीस कोठडीत लैंगिक छळही करण्यात आला’ असं ट्विट मीना हॅरीस यांनी केलं होतं. याबद्दल बोलताना आपल्याला जगभरातून मिळालेल्या समर्थनासाठी नोदीपनं लोकांचे आभार मानलेत.