१ फेब्रुवारी रोजी मुंबईतील आझाद मैदानात मुंबई प्राइड सॉलिडेटरी गॅदरींग २०२०चं आयोजन करण्यात आलं होतं. यावेळी काही लोकांनी नागरिकत्व दुरुस्ती कायद्याविरोधात प्रक्षोभक भाषण करणाऱ्या शर्जील इमामच्या समर्थनार्थ घोषणा दिल्या होत्या. त्याची आझाद मैदान पोलिसांनी गंभीर दखल घेतली असून याप्रकरणी आज एफआयआर दाखल करण्यात आला आहे. भादंविच्या कलम १२४ए अंतर्गत म्हणजे देशद्रोहाचा गुन्हा दाखल करण्यात आला आहे. दरम्यान, पोलिसांनी याप्रकरणी कुणालाही अटक केलेली नाही.
शर्जीलच्या कोठडीत वाढ
दरम्यान, शर्जील इमामच्या पोलीस कोठडीत तीन दिवसांची वाढ करण्यात आली आहे. त्याला आज नवी दिल्लीच्या साकेत येथील न्यायालयात हजर करण्यात आले होते. त्याला बिहारच्या जहानाबादमधून अटक करण्यात आली होती. दरम्यान, अलीगढ मुस्लिम युनिव्हर्सिटीमध्ये सीएए विरोधात सुरू असलेल्या आंदोलनात शर्जीलने देशविरोधी वक्तव्य केलं होतं. यानंतर शर्जीलविरोधात आसाम आणि उत्तर प्रदेशमध्ये देशद्रोहाच्या आरोपाखाली गुन्हा दाखल करण्यात आला होता. प्रकरण पेटल्यावर शर्जील फरार झाला होता. पोलीस शर्जील इमामचा कसून शोध घेत होते. तो बिहारच्या आपल्या घरीदेखील नव्हता. मात्र काही दिवसाने त्याला पोलिसांनी अटक केली आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
