माजी खासदार धनंजय महाडिक (Dhananjay Mahadik) यांनी सोलापूर जिल्ह्यातील भीमा साखर कारखान्याच्या कामगारांना २१ महिन्याचा पगार दिला नाही, भविष्य निर्वाह निधी दिला नाही, ही देणी आठ दिवसात न दिल्यास कारखान्याच्या दारात उपोषणाला बसण्याचा इशारा पालकमंत्री (Satej Patil) यांच्या समर्थकांनी दिला. महाडिक यांनी कोल्हापूर शहरात त्यांच्या मालकीच्या कापड दुकानाच्या चौथ्या मजल्यावर गोठा दाखवून महापालिकेची फसवणूक केल्याचा आरोपही यावेळी करण्यात आला. (supporters of guardian minister accuse )
खासदार महाडिक यांनी पालकमंत्री सतेज पाटील यांच्या विरोधात पत्रकार बैठक घेत महापालिकेचा पंधरा कोटीचा घरफाळा पाटील यांनी बुडविल्याचा आरोप केला. त्याला उत्तर देण्यासाठी पाटील यांचे सर्मथक माजी महापौर निलोफर आजरेकर, माजी नगरसेवक शारंगधर देशमुख, सचिन चव्हाण, भूपाल शेटे, मोहन सालपे, तौफिक मुलाणी, अर्जुन माने, संजय मोहिते यांनी पत्रकार बैठक घेतली. त्यांनी महाडिक यांच्यावर अनेक आरोप केले. महापालिका निवडणुकीच्या पार्श्वभूमीवर महाडिक जुनेच तुणतुणे वाजवत आहेत असा टोलाही यावेळी मारण्यात आला.
शारंगधर देशमुख म्हणाले, महापालिका निवडणुकीच्या पार्श्वभूमीवर महाडिक हे खोटे आरोप करत आहेत. त्यांच्याकडे विकासाचा कोणताही मुद्दा नाही. ते पाच वर्षे खासदार होते, त्यांचे काका महादेवराव महाडिक अठरा वर्षे आमदार होते. त्यांनी एक रूपयाचा निधी महापालिकेला दिला नाही. शहराच्या विकासासाठी एकही प्रकल्प उभारला नाही. निवडणुकीच्या तोंडावर जुनेच आरोप करत ते तुणतुणे वाजवत आहेत. त्यांच्या आदर्शा भीमा वस्त्रम, कृष्णा सेलिब्रिटी या इमारतीत बेकायदेशीर गोष्टी केल्या आहेत. त्यांच्या कापड दुकानाच्या चौथ्या मजल्यावर गोठा दाखवला आहे. चौथ्या मजल्यावर गोठा असू शकेल का ? पार्किंग म्हणून दाखविलेल्या जागेत गोडावून केले आहे. पार्किंगच्या जागेत गाळे बांधून ते विकले आहेत. त्यांनी कागल नगरपालिकेचा घरफाळा भरला नाही.
क्लिक करा आणि वाचा-
देशमुख म्हणाले, महाडिक हे सोलापूर जिल्ह्यातील भीमा साखर कारखान्याचे चेअरमन आहेत. या कारखान्याने कामगारांचा २१ महिन्याचा पगार दिला नाही. वीस महिन्यांचा निर्वाह निधी दिला नाही. निवृत्त कर्मचाऱ्यांचे सात कोटी रूपये दिले नाहीत. २०१७ चे ८० लाखांचे वाहतूक बिल दिले नाही. या हंगामातील शेतकऱ्यांची बिले दिले नाहीत. ही सर्व देणी आठ दिवसात न दिल्यास आमचे कार्यकर्ते कारखान्याच्या दारात उपोषणाला बसतील असा इशाराही त्यांनी दिला.
क्लिक करा आणि वाचा-
सचिन चव्हाण म्हणाले, महापूर, करोनाच्या काळाच्या पालकमंत्री सतेज पाटील यांनी अतिशय चांगले काम केले. त्याचे जिल्ह्यात कौतुक होत असल्यानेच त्यांना बदनाम करण्यासाठी घरफाळ्याचा जुना विषय पुन्हा पुढे आणला आहे. घरफाळा बुडविण्याचा प्रश्नच नाही. प्रशासनाने तसे कधीच कळवले नाही. घरफाळा आकारणी चुकीचे असल्याचे कळविल्यास आम्ही तो भरायला तयार आहे. ड्रिम वर्ल्ड ची एकही रूपया थकबाकी नाही. हवे तर महापालिकेने याप्रकरणी चौकशी करावी, आम्ही त्याला सहकार्य करू असेही त्यांनी स्पष्ट केले.
क्लिक करा आणि वाचा-
‘या निमित्ताने तरी महापालिका बघाल’
पाच वर्षे तुम्ही खासदार होता, आज केलेला आरोप सहा वर्षापूर्वी केला होता. त्यामुळे याप्रकरणी चौकशी करायला तुम्हाला कुणी अडविले होते का असा सवाल करत देशमुख म्हणाले, सत्तेत असताना महापालिका कसली आहे, हे कधीच बघितले नाही. आता किमान उपोषणाच्या निमित्ताने तरी महापालिका बघाल असा टोलाही त्यांनी मारला.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
