पोलिसाला चिरडून ठार मारण्याचा प्रयत्न करणारा 'तो' गवसला

नागपूर: रिंगरोडवरील शताब्दी चौकात वाहतूक पोलिसाला चिरडून ठार मारण्याचा प्रयत्न करून फरार झालेल्या कार चालकाला अजनी पोलिसांनी गोंदियातील डुग्गीपार येथे अटक केली. संदेश भोयर (वय ३८, रा.शताब्दीनगर),असे अटकेतील गुन्हेगाराचे नाव आहे. तो कुख्यात गुन्हेगार असून, त्याच्याविरुद्ध चोरी, घरफोडी,विनयभंगासह दोन डझन गुन्हे दाखल आहेत. ( of the who has been arrested)

शनिवारी सकाळी वाहतूक पोलिस नितीन वरठी हे शताब्दी चौकात कर्तव्य बजावत होते. ओमकारनगर चौकाकडून शताब्दीनगर चौकाकडे पांढऱ्या रंगाची कार (क्रमांक नसलेली) वेगात येताना वरठी यांना दिसली. चालकाने सिंग्नल तोडला. वरठी यांनी चालकाला कार थांबविण्याचा इशारा केला. चालकाने कारचा वेग वाढवून वरठी यांना धडक दिली. वरठी हे बाजूला फेकल्या गेले. यात ते जखमी झाले. दरम्यान, चालक कारसह पसार झाला.

वरठी यांना ऑरेंज सिटी हॉस्पिटलमध्ये दाखल करण्यात आले. या प्रकरणी अजनी पोलिसांनी ठार मारण्याचा प्रयत्न केल्याचा गुन्हा दाखल केला आहे. या घटनेची पोलिस आयुक्त अमितेशकुमार यांनी गंभीर दखल घेत कारचालकाला हुडकून काढण्याचे निर्देश दिले. पोलिस उपायुक्त डॉ.अक्षय शिंदे यांच्या मार्गदर्शनाखाली अजनी पोलिस स्टेशनचे वरिष्ठ पोलिस निरीक्षक विनोद चौधरी व त्यांच्या सहकाऱ्यांनी सीसीटीव्ही फुटेज तपासले. शताब्दीनगर चौकातील एका गल्लीतून तो आल्याचे पोलिसांना या फुटेजमध्ये दिसले.

क्लिक करा आणि वाचा-

पोलिसांनी चोकशी केली असता संदेश याची ओळख पटली. पोलिसांनी त्याचा मोबाइल क्रमांक मिळविला. पोलिसांनी त्याचे ‘लोकेशन’ काढले. तो डुग्गीपार येथे असल्याचे कळताच पोलिसांचे पथक तेथे गेले. संदेश याला अटक करून नागपुरात आणले. चौकशीदरम्यान त्याच्याविरुद्ध दोन डझन गुन्हे दाखल असल्याचे समोर आले. पोलिसांनी त्याला न्यायालयात हजर केले. न्यायालयाने त्याची कारागृहात रवानगी केली.

क्लिक करा आणि वाचा- क्लिक करा आणि वाचा-