मुंबईतील मुकेश अंबानी यांच्या अँटिलिया या निवासस्थानाबाहेर स्कॉर्पिओ कारमध्ये आढळलेल्या स्फोटकांप्रकरणी एनआयएनं शनिवारी सचिन वाझेंची १२ तास मॅरेथॉन चौकशी केली होती. त्यानंतर रात्री वाझे यांना अटक झाली होती. वाझेंच्या अटकेनंतर एनआयएच्या हाती भक्कम पुरावे लागल्याची चर्चा असतानाच आज वाझेंचं पुन्हा एकदा पोलीस सेवेतून निलंबन करण्यात आलं आहे. या पूर्वी १६ वर्षांपूर्वी ख्वाजा युनुस मृत्यू प्रकरणात त्यांच्यावर निलंबनाची कारवाई झाली होती.
वाचाः
सचिन वाझे यांना १६ वर्षांच्या प्रदीर्घ कालावधीनंतर ६ जून २०२० रोजी आयुक्त परमबीर सिंह यांच्या आदेशानुसार सचिन वाझे, राजेंद्र तिवारी, सुनील देसाई आणि राजाराम निकम या चारही अधिकाऱ्यांना पुन्हा सेवेत दाखल करुन घेण्यात आले होते. मात्र, अँटिलिया स्फोटके प्रकरणात सहभाग असल्याच्या संशयावरून सचिन वाझे यांच्यावर अटकेची कारवाई करण्यात आली आहे. भारतीय दंड विधानाच्या २८६, ४६५, ४७३, ५०६ (२), १२० ब आणि ४ (अ) (ब) (इ) तसेच स्फोटक पदार्थ अधिनियम १९०८ अन्वये वाझेंवर गुन्हे दाखल करण्यात आले आहेत. त्यानंतर त्यांच्यावर पुन्हा एकदा निलंबनाची कारवाई करण्यात आली आहे.
वाचाः
२००४ साली झालं होतं निलंबन
मुंबईतील घाटकोपर येथील बॉम्ब स्फोट प्रकरणात २५ डिसेंबर २००२ रोजी ख्वाजा युनूस याला अटक झाली होती. त्यानंतर तो फरार झाल्याचं पोलीसांना सांगितलं होतं. मात्र, ख्वाजाच्या नातेवाईकांनी मात्र पोलिसांवरच आरोप केले. पोलीस कोठडीत त्याचा छळ झाल्याने मृत्यू झाल्याचा आणि नंतर पोलिसांनी हा बनाव रचल्याचा आरोप त्याच्या नातेवाईकांनी केला होता. त्यांच्या केंद्रस्थानीही सचिन वाझे आणि इतर पोलीस अधिकारी होते. त्यामुळे पुढे वाझे यांच्यासह चार अधिकाऱ्यांना न्यायालयाच्या आदेशानुसार ३ मार्च २००४ रोजी निलंबित करण्यात आले होते.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
