चांगली बातमी! लहान मुलांसाठीही येणार करोना लस; चाचणी सुरू

वॉशिंग्टन: करोनाच्या संसर्गाला अटकाव करण्यासाठी अनेक देशांमध्ये लसीकरण मोहीम सुरू झाली आहे. यामध्ये १६ वर्षांवरील व्यक्तींना लस देण्यात येत आहे. नवजात बालके, अल्पवयीनांना लसीकरणातून वगळण्यात येत आहे. आता, मात्र, सहा महिन्यांच्या नवजात शिशूसह ते १२ वर्षापर्यंतच्या बालकांना लस देणे शक्य होणार आहे. अमेरिकन बायोटेक कंपनी मॉडर्ना या वयोगटासाठी लस विकसित करत आहे.

वृत्तसंस्था रॉयटर्सने दिलेल्या वृत्तानुसार, mRNA-1273 या लशीची चाचणी सुरू करण्यात आली आहे. ही लस १२ वर्षांखालील बालकांसाठी असणार असल्याची माहिती कंपनीच्यावतीने देण्यात आली आहे. या चाचणीत अमेरिका आणि कॅनडातील ६७५० मुलांचा समावेश करण्यात आला आहे. या चाचणीत लशीची सुरक्षिता आणि प्रभावीपणा यांचा अभ्यास केला जात आहे. लशीचे दोन डोस या चाचणी दरम्यान देण्यात येणार आहे.

वाचा:

मॉडर्नाने विकसित केलेल्या लशीला याआधीच १८ वर्ष व त्याहून अधिक वयाच्या व्यक्तिंना आपात्कालीन वापरासाठी लस देण्यात येत आहे. तर, डिसेंबरमध्ये १२ ते १८ वर्षाच्या अल्पवयीन मुलांसाठी mRNA-1273 लशीची चाचणी सुरू करण्यात आली आहे.

सध्या हे संशोधन नॅशनल इन्स्टिट्यूट ऑफ एलर्जी अॅण्ड इन्फेक्शन डिसीज आणि बायोमेडिकल अॅडव्हान्सड रिसर्च अॅण्ड डेव्हलपमेंट ऑथिरिटीच्या सहकार्याने केले जात आहे.

वाचा:
दरम्यान, फायजर-बायोएनटेकची लस लहान मुलांसाठी सुरक्षित असल्याचा दावा करण्यात येत आहे. इस्रायलमध्ये १२ ते १६ वर्ष या वयोगटातील ६०० मुलांना लस देण्यात आली. त्यातील एकावरही गंभीर दुष्परिणाम जाणवले नाहीत. लस चाचणीचे परिणाम समोर येण्याआधीच अशाप्रकारचा दावा करण्यात आल्यामुळे लस लहान मुलांसाठी सुरक्षित असल्याचे म्हटले जात आहे. करोना संसर्गाची बाधा होण्याचा सर्वाधिक धोका असणाऱ्या किशोरवयीन गटातील आजारी मुलांना लस देण्याची सूचना इस्रायलच्या आरोग्य मंत्र्यांनी दिली आहे. इस्रायलमधील लसीकरण मोहिमेचे प्रमुख बोज लेव यांनी सांगितले की, आम्ही आतापर्यंत ६०० मुलांना फायजरच्या लशीचा डोस दिला आहे. आतापर्यंत एकाही मुलाला गंभीर साइड इफेक्ट जाणवले नाहीत. सौम्य स्वरुपाचे साइड इफेक्टसही फार कमीजणांना जाणवली असल्याचे त्यांनी सांगितले.