बुधवारी संध्याकाळी ५ वाजता दिल्लीहून टनकपूरला येत असलेली पूर्णगिरी जनशताब्दी एक्स्प्रेस (5326) मनिहारगोठ इथे पोहोचली. त्यावेळी सिग्नल जवळ एका मोकाट जनावराला ट्रेनची धडक बसली. ट्रेनचा वेग अधिक असल्याने जनावराचा त्यात मृत्यू झाला. या धडकेने ट्रेनचा प्रेशर पाइप फुटला आणि प्रेशर डाउन झाले. प्रेशर कमी झाल्याने ट्रेन पुढे धावण्याऐवजी ती उलट्या दिशेने धावू लागली.
ट्रेन उलट्या दिशेने धावत असल्याचे पाहून चालकाने ब्रेक लावण्याचा प्रयत्न केला. पण ट्रेन थांबली नाही आणि तिचा वेग वाढत गेला. ट्रेनमध्ये २ एसी आणि ८ जनरल डबे होते. यात ६० प्रवासी होते. ट्रेन उलट्या दिशेने धावत असल्याचे पाहून प्रवासी हादरले. ट्रेनला अपघात होतो की काय याची त्यांना भीती होती. ट्रेन येऊन गेल्याने मागचे सर्व रेल्वे क्रॉसिंग गेट उघडलण्यात आले होते. यामुळे अपघाताची भीती होती. उलटी धावत असलेली ट्रेन आधी बनबसा येथे पोहोचली त्यानंतर चकरपूरला गेली आणि पुढे खटीमापासून ५ किमी आधी नदन्ना नदीजवळ जाऊन थांबली. ट्रेन उलट्या दिशेने धावत असल्याने सर्वांना अलर्ट करण्यात आलं होतं. ट्रेन थांबतात प्रवाशांनी सुटकेचा निःश्वास सोडला आणि आपलं सामान घेऊन पळत सुटले.
घटनेची माहिती मिळताच रेल्वेचे अनेक वरिष्ठ अधिकारी घटनास्थळी पोहोचले. त्यांनी या प्रकरणी सखोर माहिती घेतली.
नागरिकांमध्ये कुतूहलाचा विषय बनला
ट्रेन पुढे धावण्याऐवजी उलट्या दिशेने धावल्याने नागरिकांमध्ये हा कुतूहलाचा विषय बनला. ट्रेनला बघण्यासाठी नागरिकांनी मोठी गर्दी केली होती. यापूर्वी एक मालगाडीही अशीच उलट्या दिशेने धावली होती.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
