नाशिक: नाशिकच्या परिसरात चोरीची घटना सीसीटीव्ही फुटेजमुळे उघडकीस आली आहे. मटण व्यावसायिकांकडील २६ बोकड चोरट्यांनी पळवले. यामुळे मटण व्यावसायिकांचे जवळपास अडीच लाख रुपयांचे नुकसान झाले आहे.
सध्या मटणाला मागणी वाढली आहे. त्यामुळे बोकडांचे दरही वाढले आहेत. साडेसहाशे ते आठशे रुपये प्रतिकिलो दराने मटणाची विक्री होत आहे. त्यामुळे बोकड चोरीच्या घटना घडत आहेत. सातपूर परिसरातून २६ बोकड चोरीला गेल्याची घटना घडली आहे. सातपूर परिसरातील , श्रमिक नगरमधील तीन ते चार मटण विक्रेत्यांकडील २६ बोकड चोरट्यांनी मध्यरात्री दोनच्या सुमारास चोरून नेले. चोरटे कारमधून आले होते. कारमधील तिघांनी दुकानांचे कुलूप तोडले. त्यातील २६ बोकड कारमध्ये कोंबले आणि पोबारा केला.
ही सर्व घटना परिसरातील सीसीटीव्ही कॅमेऱ्यात कैद झाली आहे. या प्रकरणी मटण विक्रेत्यांनी सातपूर पोलीस ठाण्यात चोरीची तक्रार दाखल केली आहे. पोलिसांनी गुन्हा दाखल करून तपास सुरू केला आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
