नव्याने झालेल्या २५० कोटी रुपयांचा भांडवली भरणा हा कंपनीला तिच्या वितरण क्षमता विस्तारासाठी आवश्यक वृद्धी भांडवल प्रदान करेल. या व्यतिरिक्त २७५ कोटी रुपयांच्या दुय्यम विक्रीमुळे मॅग्मा फिनकॉर्प लिमिटेड आणि तिच्या समूहातील कंपन्यांना विमा कंपनीच्या भागभांडवलाच्या मालकी संदर्भात भारतीय रिझर्व्ह बँकेच्या मार्गदर्शक सूचनांचे पालन करण्यास सक्षमता मिळणार आहे.
या व्यवहाराला विमा नियंत्रक आणि विकास प्राधिकरण (आयआरडीएआय) आणि भारतीय स्पर्धा आयोग (सीसीआय) तसेच नियामक यंत्रणांकडून मंजुरी मिळणे प्रतीक्षेत आहे. गुंतवणूकदारांकडून जे नव्याने वृद्धीपूरक भांडवल आले आहे त्यामुळे कंपनीला व्यवसायात विस्तारासह नवीन संधी धुंडाळण्यास मदत मिळणार आहे. ताजा साथीच्या रोगाचा प्रादुर्भाव पाहता लोकांचा विमा संरक्षणाकडे पाहण्याचा कल बदलला असून, देशात अत्यल्प असणारे विम्याचे संरक्षण पाहता कंपनीला वाढीसाठी अमर्याद वाव दिसून येत आहे, असे मत मॅग्मा एचडीआय जनरल इन्शुरन्सचे व्यवस्थापकीय संचालक आणि मुख्य कार्यकारी अधिकारी राजीव कुमारस्वामी यांनी व्यक्त केले.
मॅग्मा एचडीआयमध्ये एक भागधारक म्हणून आमचे पाठबळ कायम राखताना आनंद होत आहे आणि एक तरुण व वेगाने वाढत असलेल्या या कंपनीला भविष्यात मोठ्या वाढीच्या संधी आम्हाला दिसून येतात. आगामी काही वर्षात कंपनी पूर्ण क्षमतेने या संधीचे सोने करेल असा विश्वास सीरम इन्स्टिट्यूट ऑफ इंडियाचे मुख्य कार्यकारी अधिकारी यांनी व्यक्त केला.
मागील तीन वर्षात ४५ टक्के वार्षिक सरासरी दराने वाढ साधणारी मॅग्मा एचडीआय जनरल इन्शुरन्स ही देशाच्या सामान्य विमा क्षेत्रात वेगवान विकास करीत असलेली कंपनी आहे. कंपनीचे सॉल्व्हन्सीचे गुणोत्तर हे ३१ डिसेंबर २०२० अखेर १.८१ पट आहे, जे नियमानुसार आवश्यक १.५ पटीच्या तुलनेत सरस आहे. डिसेंबर २०२० अखेर संपलेल्या आर्थिक वर्षातील नऊ महिन्यांत कंपनीने, ९११.२ कोटी रुपयांच्या प्रीमियम उत्पन्नावर (जीडब्ल्यूपी) २२.३ कोटी रुपयांचा करोत्तर नफा कमावला आहे. आधीच्या वर्षातील याच नऊमाहीसाठी हेच प्रमाण, ९४८.५ कोटी रुपयांच्या प्रीमियम उत्पन्नावर, ७.३ कोटी रुपयांचा करोत्तर नफा असे होते. डिसेंबर २०२० अखेर कंपनीकडून झालेल्या गुंतवणुकांचे प्रमाण २,८८१ कोटी रुपये असे दमदार आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
