म. टा. वृत्तसेवा, अंबरनाथ: नवी मुंबईतील एका इमारतीचे दोन मजले आगीने वेढले असतानाच शनिवारी संध्याकाळी अंबरनाथही आगीने धुमसले. पश्चिमेच्या मोरीवली एमआयडीसी मधील मीरा या अगरबत्ती आणि परम्युम तयार करणाऱ्या कारखान्याला शनिवारी रात्री आठच्या सुमारास आग लागली. या आगीने काही मिनिटांत संपूर्ण कंपनी वेढली. ज्वलनशील पदार्थांमुळे आग पसरत गेली.
आगीचे वृत्त समजताच आनंदनगर एमआयडीसी, अंबरनाथ, बदलापूर, उल्हासनगर, कल्याण-डोंबिवलीहून अग्निशमन दलाच्या गाड्या घटनास्थळी दाखल झाल्या. त्यानंतर तातडीने आग विझवण्याच्या कामास सुरुवात करण्यात आली. रात्री ११च्या सुमारास आगीवर नियंत्रण मिळवण्यात यश आले. या कंपनीतील काम आठ वाजता संपत असल्याने आतमध्ये कोणीही अडकले नव्हते, अशी माहिती अंबरनाथ अग्निशम दलाचे प्रमुख भागवत सोनावणे यांनी दिली.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
