आज बँका आणि वित्त संस्थाच्या शेअरमध्ये मोठी वाढ झाली. सेन्सेक्स मंचावर अल्ट्राटेक सिमेंटचा शेअर ३ टक्क्यांनी वधारला. त्याखालोखाल इंडसइंड बँक, आयसीआयसीआय बँक, एचडीएफसी बँक, टायटन, ऍक्सिस बँक, एसबीआय, मारुती या शेअरमध्ये वाढ झाली. तर दुसरीकडे ओएनजीसी, पॉवरग्रीड, आयटीसी, एनटीपीसी, महिंद्रा अँड महिंद्रा, एचडीएफसी आदी शेअर घसरले.
कर्जवसुली स्थागितीच्या प्रकरणी (लोन मोरॅटिरियम) आज मंगळवारी सर्वोच्च न्यायालयाने अंतिम निकाल जाहीर केला. न्यायालयाने थकीत कर्ज हप्त्यांवर व्याजावर व्याज आकारू नये, असे आदेश दिले आहे. तसेच ज्या बँकांनी व्याजावर व्याज आकारले आहे त्यांनी पुढील मासिक हप्त्यामध्ये ते वजा करावे असे सांगून न्यायालयाने आज कर्जदारांना मोठा दिलासा दिला. याचा परिणाम आज बँकांच्या शेअरवर दिसून आला.
आज बाजार बंद होताना सेन्सेक्स २८० अंकांनी वधारला आणि ५००५१.४४ अंकावर स्थिरावला. राष्ट्रीय शेअर बाजाराचा निफ्टी ७८ अंकांनी वधारून १४८१४ अंकावर बंद झाला. आज दिवसभरात सेन्सेक्सने ५०० अंकांची झेप घेतली होती. निफ्टी मंचावर आज मेटल, एफएमसीजी, मीडिया या क्षेत्रीय निर्देशांकात घसरण झाली. निफ्टी पीएसयू बँक आणि निफ्टी बँक आदी निर्देशांक वधारले.
आजच्या तेजीत जवळपास २८० हून अधिक शेअरने वर्षभराचा उच्चांकी स्तर गाठला. ज्यात बँक ऑफ महाराष्ट्र, इंडियन ओव्हरसीज बँक, रिलायन्स इन्फ्रास्ट्रक्चर, बँक ऑफ इंडिया, जयप्रकाश असोसिएट, अदानी पॉवर, आएफसीआय, रिलायन्स पॉवर , सेंट्रल बँक इंडिया या शेअरला मुंबई शेअर बाजारात अप्पर सर्किट लागले होते.
याआधी सोमवारी सेन्सेक्स ८७ अंकाच्या घसरणीसह ४९७७१ अंकावर स्थिरावला होता. तर निफ्टी निर्देशांक घसरणीतून काहीसा सावरला. निफ्टी १४७३६ अंकांवर बंद झाला होता. त्यात किरकोळ ७ अंकांची घसरण झाली होती.करोना रुग्णसंख्येत होणारी वाढ आणि लॉकडाउनची टांगती तलवार यामुळे भांडवली बाजारात चिंतेचे वातावरण असल्याचे शेअर दलालांनी सांगितले.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
