भारताविरुद्धच्या पहिल्या एकदिवसीय सामन्यात इंग्लंडचा कर्णधार इयान मॉर्गनच्या डाव्या हाताच्या अंगठ्याला आणि बोटाला दुखापत झाली होती. ही दुखापत इतकी गंभीर होती की त्याला चार टाके पडले होते. त्यानंतरही मॉर्गन हा मैदानात उतरला होता. पण ही दुखापत गंभीर स्वरुपाची असल्याचे आता स्पष्ट झाले आहे. त्यामुळेच इंग्लंडचा कर्णधार आता या मालिकेतील एकही सामना खेळू शकणार नाही.
मॉर्गन खेळणार नसल्यामुळे आता इंग्लंडचे कर्णधारपद कोणाकडे जाणार, याची उत्सुकता सर्वांनाच असेल. मॉर्गन खेळत नसताना भारताविरुद्धच्या अन्य दोन सामन्यांसाठी इंग्लंडचे नेतृत्व जोस बटलरकडे सोपवण्यात येणार आहे. त्याचबरोबर मॉर्गनच्या जागी आता इंग्लंडच्या संघामध्ये लायम लिव्हिंगस्टोनला संधी देण्यात आलेली आहे. त्यामुळे आता संधी मिळालेला लायम कशी कामगिरी करतो, याकडे सर्वांचेच लक्ष असेल.
इंग्लंडच्या सॅम बिलिंग्सलाही पहिल्या सामन्यात दुखापत झाली होती. त्यामुळे आता तो भारताविरुद्धचा दुसरा सामना खेळू शकणार नाही. त्याचबरोबर सॅम भारताविरुद्धच्या तिसऱ्या एकदिवसीय सामन्यात खेळणार की नाही, याचा निर्णय अजूनही झालेला नाही. सॅमच्या जागी इंग्लंडच्या संघात डेव्हिड मलानला संधी देण्यात आली आहे. मलान हा इंग्लंडच्या ट्वेन्टी-२० संघात होता. ट्वेन्टी-२० क्रिकेटमध्ये मलानने धडाकेबाज फलंदाजीही केली होती. त्यामुळे आता इंग्लंडला मलानचा चांगला उपयोग करुन घेता येईल, असे म्हटले जात आहे.
इंग्लंडचा संघ आता भारताविरुद्धच्या दोन्ही एकदिवसीय सामन्यांसाठी जोस बटलरच्या नेतृत्वाखाली उतरेल. इंग्लंडने पहिला सामना गमावला आहे, त्यामुळे आता दुसरा सामना इंग्लंडसाठी करो या मरो, असा असेल. हा सामना इंग्लंडने गमावला तर त्यांचे या मालिकेतील आव्हान संपुष्टात येऊ शकते. त्यामुळे दुसरा सामना इंग्लंडसाठी निर्णायक ठरणार आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
