अॅसिड टाकण्याची धमकी देऊन विद्यार्थिनीवर लैंगिक अत्याचार केल्याचा धक्कादायक प्रकार समोर आला आहे. या प्रकरणी पीडित मुलीच्या आईने दिलेल्या तक्रारीनुसार, कोरेगाव पार्क पोलिस ठाण्यात बाललैंगिक अत्याचार प्रतिबंधक कायद्यानुसार गुन्हा दाखल करण्यात आला असून, एका २५ वर्षीय तरुणाला अटक करण्यात आली आहे.
पोलिसांनी दिलेल्या माहितीनुसार, तक्रारदार यांची मुलगी कोरेगाव पार्क परिसरातील एका इंग्रजी माध्यमाच्या शाळेत शिकते. आरोपी तिचा पाठलाग करून तिला त्रास देत होता. दर रोज तो शाळेबाहेर थांबून पीडितेचा पाठलाग करत होता; तसेच, ‘तुझ्या चेहऱ्यावर अॅसिड टाकेल आणि तुझ्या घरच्यांना मारेल,’ अशी धमकीही त्याने तिला दिली होती.
घटनेच्या दिवशी तो जबरदस्तीने पीडितेला वाघोली परिसरात घेऊन गेला. त्याने तेथे तिच्यावर लैंगिक अत्याचार केले आणि त्याचा व्हिडिओदेखील तयार केला. घडलेला प्रकार कोणालाही सांगितल्यास व्हिडिओ व्हायरल करण्याची धमकी त्याने पीडितेला दिली. दरम्यान, आरोपीचा त्रास वाढत असल्याने पीडितेने घडलेला सर्व प्रकार पालकांना सांगितला. त्यानंतर पीडितेच्या आईने कोरेगाव पार्क पोलिस ठाण्यात दिलेल्या तक्रारीनुसार आरोपाला गुन्हा दाखल करून अटक करण्यात आली आहे. कोरेगाव पार्क पोलिस घटनेचा तपास करीत आहेत.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
