​बेपत्ता जवानाच्या मुलीची वडिलांना आर्त हाक… 'पप्पा लवकर या हो'

रायपूरः छत्तीसगडमधील नक्षलवादी हल्ल्यात ( ) सीआरपीएफच्या कोब्रा कमांडोमधील राजेश्वर सिंह बेपत्ता () होते. ते आमच्या ताब्यात असल्याचा दावा नक्षलवाद्यांनी केला आहे. आता राजेश्वर सिंह यांच्या मुलीचा एक व्हिडिओ समोर आला आहे. यात ती रडताना दिसते आहे. पप्पा लवकर घरी या हो, असं ती म्हणते आहे. व्हिडिओमध्ये बेपत्ता जवानाचे नातेवाईकही दिसत आहेत. हा व्हिडिओ छत्तीसगडमधील एका वरिष्ठ आयपीएस अधिकाऱ्याने शेअर केलाय.

नक्षलवाद्यांनी सोमवारी माध्यमांच्या काही प्रतिनिधींना फोन करून बेपत्ता जवान आमच्या ताब्यात आसल्याचा दावा केला. तसंच राजेश्वर सिंह यांना कुठलीही इजा करणार नाही. पण त्यांच्या सुटकेसाठी काही अटी ठेवल्या आहेत. यानंतर राजेश्वर सिंह यांचे कुटुंबीय माध्यमांशी बोलले होते.

बेपत्ता कमांडोच्या पत्नीने नक्षलवाद्यांच्या अटी पूर्ण करण्याचे आवाहन रत आपल्या पतीची सुरक्षित सुटका करण्याची मागणी केली आहे. शुक्रवारी रात्री साडे नऊ वाजता आपलं पतीशी शेवटचं बोलणं झालं होतं. मी मोहीमेवर जात आहे. जेवण बांधून घेतोय. मोहीमेवरून परतल्यानंतर शनिवारी बोलू, असं ते म्हणाल्याचं जवनाच्या पत्नीने सांगितलं.

बेपत्ता जवान राजेश्वर सिंह यांच्या आईनेही मुलाच्या सुटकेसाठी पंतप्रधान मोदींना आवाहन केलं आहे. आपल्याला मुलाशिवाय कुणाचाच आधार नाहीए. सरकारने कुठल्याही परिस्थितीत त्याची सुटका करावी, असं त्यांनी म्हटलंय.

छत्तीसगडमधील आयपीएस अधिकारी दिपांशू काबरा यांनी बेपत्ता कमांडोच्या मुलीचा हा भावूक व्हिडिओ सोशल मीडियावर शेअर केला आहे. यात ती रडत आपल्या वडिलांना परत येण्याचं आवाहन करताना दिसते आहे.