जळगाव जिल्हा शासकीय वैद्यकीय महाविद्यालय व रुग्णालयात चोपडा तालुक्यातील आदीवासी बाधित रुग्णाला भेदभावाची वागणूक देत उपचारात निष्काळजीपणा केल्याने त्याचा मृत्यू झाल्याचा धक्कादायक आरोप त्याच्या कुटुंबियांकडून करण्यात आला आहे. या आरोपाबाबत लोकसंघर्ष मोर्चा यांनी मुख्यमंत्री व राज्यपाल यांच्याकडे निवेदन देवून चौकशीची मागणी केली आहे. तसेच याबाबत शहर पोलिस ठाण्यात देखील तक्रार देण्यात आली आहे. (relatives allege that a infected patient died due to discrimination in )
याबाबत लोक संघर्ष मोर्चाच्या अध्यक्ष प्रतिभा शिंदे यांच्यासह राज्यातील ८० संघटनांकडून मुख्यमंत्र्यांना हे निवेदन देण्यात आले आहे. यात म्हटले आहे की, चोपडा तालुक्यातील लासूर येथील प्रदीप पावरा यांची २९ मार्च प्राथमिक आरोग्य केंद्रात तपासणी केली असता, त्यांचा रिपोर्ट पॉझिटिव्ह आला. त्यांना अॅम्बुलन्स न मिळाल्याने ते मुलगा व बायकोबरोबर मोटार सायकलवरुन २२ किमीचा प्रवास करत चोपडा प्राथमिक केंद्रात आले. तेथून त्यांना शासकीय वैद्यकीय महाविद्यायात जाण्यास सांगण्यात आले. तेथे त्यांनी बेड असतानाही नसल्याचे सांगितले. त्यामुळे अॅम्बुलन्समधील ऑक्सिजन संपत आल्याने त्यांना नाईलाजाने खाजगी रुग्णालयात दाखल केले. तेथे मेडिकल बिल जास्त होत असल्याने दुसऱ्याच दिवशी जिल्हाधिकारी मार्फत त्याला शासकीय वैद्यकीय महाविद्यालय रुग्णालयात दाखल करण्यात आले.
उपचार सुरु असतांना दि. २ एप्रिल रोजी सायंकाळी ७ वाजता त्यांच्या कुटुंबियांना डॉक्टरांनी सांगितले की यांना दहा दिवस तरी आयसीयूमधून हलवता येणार नाही. त्याचवेळी रुग्ण प्रदीपला कुटुंबीय भेटले असता त्यांनी, इथले एक डॉक्टर आणि वॉर्डबॉय हे त्यांचा खूप राग करतात “आई शपथ तुला उपचार करणार नाहीत म्हणतात” असे सांगितले. कुटुंबीयांनी तशी तक्रार लगेच अधिष्ठाता यांच्याकडे केली होती.
क्लिक करा आणि वाचा-
‘रात्री प्रकृती गंभीर असताना हलविले’
आयसीयूमधे एकूण ४६ रुग्ण असताना रात्री १२ वाजता अचानक प्रदीप पावरा गंभीर रुग्ण असतांना देखील आयसीयूमधून पीएनजी वॉर्डमध्ये हलवण्यात आले. तेथे रात्री ते पलंगावरून खाली पडले व बराच वेळ ते त्याच अवस्थेत होते. त्यावेळी त्यांना ऑक्सीजन मिळाला नाही व त्यांची तब्बेत अधिक खालावली. ते अचेतन अवस्थेत गेले. त्यानतंर ते उठलेच नाही आणि त्याचा मृत्यू झाला. सर्व वॉर्डमधे सीसीटीव्ही आहे. अगदी त्यांनी रेकॉर्ड रूम व एका अडगळीच्या रूम ला पण कॅमेरे लावले आहेत. मात्र आयसीयू व पीएनजी वॉर्डमधे सीसीटीव्ही कॅमेरे लावलेले नाहीत. हा शासीकीय वैद्यकीय महाविद्यालयाच्या निष्काळजीपणाचा बळी आहे, असा आरोप त्यांची पत्नी व मूले व लोक संघर्ष मोर्चा संघटनेने केला आहे.
क्लिक करा आणि वाचा-
आदिवासी असल्याने भेदभाव
पहाटे चार वाजता त्यांचा मृत्यू झाल्यानतंर लोक संघर्ष मोर्चाकडून त्यांच्या मुलाच्या नावाने जळगाव शहर पोलीस ठाण्यात तक्रार अर्ज देखील करण्यात आला आहे. प्रदीप पावरा हा आदिवासी असून त्याच्याबाबत जी भेदभावपूर्ण वागणूक व उपचाराबाबत जी हेळसांड केली गेली ती अत्यंत आक्षेपार्ह व निषेधार्ह आहे. या अन्याया विरुध्द त्याच्या कुटुंबियांना न्याय देण्याची मागणी लोक संघर्ष मोर्चाकडून करण्यात आली आहे.
क्लिक करा आणि वाचा-
या आहेत मागण्या
> एक नि:पक्षपाती समिती नेमून याची चौकशी केली जावी. दोषींवर कारवाई करावी.
> रुग्णालयात ड्युटीवर असलेले डॉक्टर व वार्डबॉय यांना निलंबित करावे.
> अनुसूचित जाती व जमाती अत्याचार प्रतिबंधक कायद्यातंर्गत कारवाई करावी.
> प्रदीप पावरा यांच्या कुटुंबीयांना आर्थिक नुकसान भरपाई मिळावी.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
