साताराः करोना रुग्णसंख्या आटोक्यात आणण्यासाठी राज्य सरकारने विंकेड लॉकडाउनची घोषणा केली आहे. या लॉकडाउनच्या विरोधात भाजपचे खासदार यांनी आज आंदोलन केलं आहे. सातारा येथील पोवई नाका येथे झाडाखाली कटोरा घेऊन बसत भीक मांगो आंदोलन केलं आहे. दरम्यान, कटोऱ्यात जमा झालेले पैसे शासकीय अधिकाऱ्याकडे जमा करणार असल्याचंही उदयनराजेंनी सांगितलं आहे. सध्या उदयनराजेंच्या आंदोलनाची चर्चा सर्वत्र रंगली आहे.

लॉकडाऊनला विरोध करण्यासाठी आज उदयनराजे यांनी सातारा येथे अनोखं आंदोलन केलं आहे. यावेळी त्यांनी सचिन वाझे प्रकरण, करोना लसीकरण व लॉकडाउनवरुन राज्य सरकारवर टीका केली आहे. करोना थोपवण्यासाठी लॉकडाउन हा पर्याय आहे असं कोणत्या तज्ज्ञांनी सांगितलं आहे, हे जनतेला कळायला हवं, असं म्हणत उदयनराजेंनी सरकारवर हल्लाबोल केला आहे.

‘ज्याचं हातावर पोट आहे त्यांची लॉकडाउनमुळं काय अवस्था झाली असेल. करोनावरील लसीकरण मिळत नाही आणि ज्यांना करोना लस दिलीये ते पॉझिटिव्ह मिळत आहेत. हा काय बाजार मांडलाय का? असा सवाल त्यांनी केला आहे. तसंच, लॉकडाउन हटवून टाका असं मी महाराष्ट्राच्या जनतेला आवाहन करतो. हे सगळं धुळफेक आहे. वाझे प्रकरण लपवण्यासाठी आहे,’ असा आरोपही उदयनराजेंनी केला आहे. सणासुदीचे दिवस आलेत. कामगार लोक आहेत, व्यापारांनी कर्ज काढलं आहे. बँकानी त्यांच्यासमोर पैशासाठी तगादा लावलाय आणि लॉकडाउनमुळं तुम्ही त्यांना भीकेला लावणार का? असा सवाल उदयनराजेंनी सरकारला केला आहे.

दरम्यान, उदयनराजेंनी याआधी लॉकडाउनच्या नियमावलींचा सरकारने पुर्नविचार करावा अन्यथा जनतेतून उद्रेक होऊल, असा इशारा दिला होता. फेसबुकवर सविस्तर पोस्ट लिहत त्यांनी लॉकडाउनचा विरोध केला होता.

उदयनराजेंची फेसबुक पोस्ट

संपूर्ण महाराष्ट्रात करोनाचा प्रादुर्भाव मोठ्या प्रमाणावर वाढत असून मुंबई-पुण्यासारख्या शहरातील रुग्णांची संख्याही झपाट्याने वाढत आहे. त्या पार्श्वभूमीवर राज्य सरकारने घातलेल्या निर्बंधांना छोटे व्यावसायिकांसह विविध क्षेत्रातून जोरदार विरोध होत आहे. करोना काळात लावण्यात आलेल्या कठोर निर्बंधांमुळे सर्वसामान्य माणसांमध्ये कमालीची अस्वस्थता निर्माण झाली आहे. जर लॅाकडाउन सारखी परिस्थिती कायम राहणार असेल तर या दरम्यान बुडणाऱ्या रोजगाराची भरपाई सरकारने थेट लाभार्थ्यांच्या बॅंक खात्यात जमा करून जनतेला किमान दिलासा द्यावा. अन्यथा जनतेत उद्रेक झाल्याशिवाय राहणार नाही, असं त्यांनी म्हटलं होतं.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here