एका ३४ वर्षीय महिलेने बिबवेवाडी पोलीस ठाण्यात फिर्याद दिली आहे. त्यावरून तिच्या पतीवर (वय ३५) गुन्हा दाखल केला आहे. बिबवेवाडीतील विघ्नहर नगरमध्ये शुक्रवारी रात्री अकराच्या सुमारास हा प्रकार घडला. पोलिसांनी दिलेल्या माहितीनुसार, फिर्यादी, त्यांचा नवरा आणि एक मुलगा असे तिघे जण बिबवेवाडीतील विघ्नहर नगर परिसरात राहतात. फिर्यादीचा पती दररोज रात्री कोणाशी तरी चॅटिंग करत असल्याचे त्यांना आढळून आले होते. त्यामुळे ९ एप्रिलला रात्री फिर्यादी यांनी “तुम्ही रोज एवढ्या रात्री रोज सारखे कोणाशी चॅटींग करता? आमच्या सोबत का नाही बोलत?” असे तिने नवऱ्याला विचारले. त्यामुळे तिच्या नवऱ्याला राग आला. त्याने चिडून फिर्यादीला शिवीगाळ करून कंबरेच्या पट्ट्याने, वायरने आणि लाकडी बांबूने मारहाण केली. तसेच, जीवे मारण्याची धमकी दिली.
मुलालाही जीवे मारण्याची धमकी
हा संपूर्ण प्रकार सुरू असताना त्यांचा मुलगा घरातच होता. त्याने भांडणे सोडविण्याचा प्रयत्न केला असता, आरोपीने मुलालाही मारहाण केली. तसेच जीवे मारण्याची धमकी दिली. या प्रकरणी बिबवेवाडी पोलीस पुढील तपास करत आहेत.
गर्लफ्रेंडसोबत राहायला मिळावे म्हणून बायकोला त्रास?
आरोपीचे लग्न झालेले असतानाही त्याला एक गर्लफ्रेंड आहे, अशी माहिती पोलिसांनी फिर्यादिकडे केलेल्या चौकशीतून स्पष्ट झाली आहे. गर्लफ्रेंडसोबत राहायला मिळावे, म्हणून तो बायको आणि मुलाला त्रास देत असल्याचे फिर्यादी महिलेने सांगितल्याचे तपास अधिकारी सहायक पोलीस निरीक्षक किरण देशमुख यांनी सांगितले.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
