कृष्णवर्णीय जॉर्ज फ्लॉएडला न्याय मिळाला!; हत्या प्रकरणात पोलीस अधिकारी दोषीच

वॉशिंग्टन: अमेरिकेत मागील वर्षी झालेल्या कृष्णवर्णीय जॉर्ज फ्लॉएडच्या हत्या प्रकरणात कोर्टाने पोलीस अधिकाऱ्याला दोषी ठरवले आहे. वॉशिंग्टनच्या हेनपिन काउंटी कोर्टाच्या ज्युरीने १० तासांच्या दीर्घ चर्चेनंतर आरोपी पोलीस अधिकारी डेरेक शॉविन हा तीन गुन्ह्यांमध्ये दोषी आढळला. दोन महिन्यात डेरेकच्या शिक्षेबाबत सुनावणी होणार आहे. जॉर्जवर पोलीस करत असलेल्या कारवाईची व्हिडिओ क्लिप व्हायरल झाली होती. जॉर्जच्या मृत्यूनंतर अमेरिकेत आंदोलनाचा आगडोंब उसळला होता.

काय होऊ शकते शिक्षा ?

अमेरिकन कायद्यानुसार, दुसऱ्या श्रेणीतील गैर-हेतुपरस्पर करण्यात आलेल्या हत्येसाठी अधिकाधिक ४० वर्षांची शिक्षा, तिसऱ्या श्रेणीत येणाऱ्या हत्या प्रकरणात २५ वर्षाची शिक्षा आणि दुसऱ्या श्रेणीत येणाऱ्या हत्येच्या प्रकरणात १० वर्षांची अथवा २० हजार डॉलरचा दंड आदी शिक्षेची तरतूद आहे. त्यामुळे दोषी पोलीस अधिकारी डेरेक शॉविन याला ७५ वर्षाच्या कारावासाची शिक्षा होऊ शकते. मात्र, ही शिक्षा एकत्रित भोगावी लागेल अथवा वेगवेगळी असेल याबाबत अद्याप स्पष्ट करण्यात आले नाही.

निकाल सुनावताना आरोपी डेरेक शॉविन याला कोर्टात हजर करण्यात आले होते. दोषी आढळल्यानंतर त्याला मंगळवारी मिनेसोटामधील ओक पार्क हाइट्स तुरुंगात नेण्यात आले. डेरेकला एकत्रितपणे शिक्षा सुनावली तरी त्याला तुरुंगात कमीत कमी बारा वर्ष सहा महिने आणि अधिकाधिक ४० वर्षे काढावी लागतील. ज्युरी पॅनलमध्ये सहा श्वेतवर्णीय, सहा अश्वेतवर्णीय आणि एक मल्टिरेशियल ज्युरींचा समावेश होता. यात सात महिला आणि पाच पुरुषांचा समावेश होता. या निकालावर प्रतिक्रिया देताना फ्लॉएडचा लहान भाऊ फिलोनाइसने समाधान व्यक्त करताना आम्ही पुन्हा एकदा श्वास घेत असल्याचे सांगितले.

दरम्यान, जॉर्जच्या मृत्यू प्रकरणी मिनियापोलिस प्रशासन आणि त्याच्या कुटुंबीयांमध्ये नुकसान भरपाईबाबत सहमती झाली. जॉर्ज फ्लॉइडच्या कुटुंबीयांना तब्बल २.७ कोटी डॉलर म्हणजे जवळपास १९६ कोटी रुपये मिळणार आहे. तर, आरोपी पोलीस अधिकाऱ्यावर खटला सुरूच राहणार होता.

वाचा: काय होते प्रकरण?
जॉर्ज फ्लॉइडचा २५ मे २०२० रोजी मृत्यू झाला होता. जॉर्ज फ्लॉइड एका दुकानात सिगरेट खरेदी करण्यासाठी गेला होता. मात्र, त्यावेळी दुकानातील कर्मचाऱ्याने जॉर्जने २० डॉलरची बनावट नोट दिली असल्याचा आरोप करत पोलिसांना बोलावले. पोलिसांनी जॉर्जला अटक करण्यासाठी त्याला जमिनीवर पाडले आणि त्याची मान गुडघ्याने दाबली. जवळपास ९ मिनिटे जॉर्जची मान दाबली गेली होती. त्यावेळी जॉर्जने श्वास घेता येत नसल्याचे पोलिसांनी सांगितले. मात्र, पोलिसांनी त्याकडे दुर्लक्ष केले. अखेर त्यात त्याचा मृत्यू झाला.

वाचा:

फ्लॉएडच्या हत्येनंतर अमेरिकेत पेटले होते आंदोलन

जॉर्जच्या मृत्यूनंतर मिनियापोलिस आणि नंतर अमेरिकेत वर्णद्वेषाविरोधात आंदोलन सुरू झाले. अनेक ठिकाणी या आंदोलनाला हिंसक वळणही लागले. तत्कालीन अमेरिकेचे अध्यक्ष डोनाल्ड ट्रम्प यांनी लष्करी कारवाईचाही इशारा दिला होता. या आंदोलनाचे मोठे पडसाद उमटले होते.