विरारमध्ये कोविड हाॅस्पिटलला आग; १३ जणांचा होरपळून मृत्यू

घर: नाशिकमधील ऑक्सिजन गळतीची दुर्घटना ताजी असतानाच आज जिल्ह्यात आगीची भयंकर घटना घडली आहे. विरार येथील विजय वल्लभ या कोविड रुग्णालयात आग लागून १३ जणांचा होरपळून मृत्यू झाला आहे.

मध्यरात्री तीनच्या सुमारास रुग्णालयाच्या आयसीयूमधील एसीच्या कॉम्प्रेसरमध्ये ही आग लागली. वॉर्डात ऑक्सिजन असल्यानं आग लगेचच सर्वत्र पसरली. त्यामुळं एकच गोंधळ उडाला. आगीची घटना घडली तेव्हा आयसीयूमध्ये एकूण १७ रुग्ण होते. अग्निशामक दलाने तात्काळ हालचाली करून चार रुग्णांना वाचवले. मात्र, इतर १३ रुग्णांचा मृत्यू झाला, अशी माहिती वसई-विरार महापालिकेनं दिली आहे. काही तासांच्या प्रयत्नांनंतर ही आग आटोक्यात आली असल्याचे अग्निशमन दलाचा अधिकाऱ्यांनी सांगितले. रुग्णालयातील इतर रुग्णांना दुसरीकडं हलवण्यात आलं आहे.

मृतांची नावं:

निलेश भोईर, उमा कनगुटकर, पुखराज वैष्णव, रजनी आर कडू, जनार्दन मोरेश्वर म्हात्रे, नरेंद्र शंकर शिंदे, रमेश टी उपयान, कुमार किशोर दोशी, रामा अण्णा म्हात्रे, सुप्रिया देशमुखे, प्रविण शिवलाल गोडा, अमेय राजेश राऊत, सुवर्णा एस पितळे