राजस्थानने आजच्या सामन्यात नाणेफेक जिंकली आणि त्यांनी कोलकाताला प्रथम फलंदाजी करण्यासाठी पाचारण केले. पण यावेळी केकेआरची सुरुवात चांगली झाली नाही. कारण केकेआरचा युवा सलामीवीर शुभमन गिल ११ धावांवर बाद झाला आणि त्यांना पहिला धक्का बसला. त्यावेळी केकेआरची अवस्था १ बाद २४ अशी होती.
गिल बाद झाल्यावर केकेआरच्या अन्य फलंदाजांनाही मोठी खेळी साकारण्यात अपयश आले. आतापर्यंत नितीष राणा हा चांगल्या फॉर्मात होता. पण आजच्या सामन्यात राणाला २२ धावांवर समाधान मानावे लागले. राणाला यावेळी राजस्थानचा युवा गोलंदाज चेतन साकरियाने बाद केले. राणा बाद झाला असला तरी एकाबाजूने राहुल त्रिपाठी हा धावा जमवत होता. पण राहुलला यावेळी दुसऱ्या टोकाकडून चांगली साथ मिळाली नाही.
राणा बाद झाल्यावर सुनिल नरिन हा फलंदाजीसाठी आला. नरिन मोठे फटकेबाजी करेल, असे वाटत होते. पण नरिनला यावेळी सहा धावांवरच समाधान मानावे लागले. त्यानंतर केकेआरचा कर्णधार इऑन मॉर्गन हा फलंदाजीसाठी आला. पण मॉर्गनला यावेळी भोपळाही फोडता आला नाही. मॉर्गन बाद झाल्यावर काही वेळातच केकेआरचा स्थिरस्थावर झालेला फलंदाज राहुलही बाद झाला आणि संघाला मोठा धक्का बसला. राहुलने यावेळी २६ चेंडूंत एक चौकार आणि दोन षटकारांच्या जोरावर ३६ धावांची खेळी साकारली.
राहुल बाद झाल्यावर दिनेश कार्तिक आणि आंद्रे रसेल हे फलंदाजी करत होते. गेल्या सामन्यात रसेलने या मैदानात २१ चेंडूंत आपले अर्धशतक साकारले होते. त्यामुळे रसेलकडून या सामन्यात मोठ्या अपेक्षा होत्या. पण रसेलला यावेळी फक्त ९ धावांवरच समाधान मानावे लागले. रसेलला यावेळी ख्रिस मॉरिसने डेव्हिड मिलरकरवी झेलबाद केले.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
