वाचा:
लससाठ्याच्या उपलब्धतेची वस्तुस्थिती पाहता उद्या दुसरी मात्रा घेण्यास पात्र असणाऱ्यांनीच लसीकरणासाठी यावे, असे आवाहन मुंबई महापालिकेकडून करण्यात आले आहे. लससाठ्याचा ओघ वाढल्यानंतर लसीकरण मोहीम पूर्ववत सुरू होईल, असेही नमूद करण्यात आले आहे. कार्यक्षेत्रात प्रतिबंधक लसीकरण मोहिमेतंर्गत महानगरपालिका व शासन यांच्यातर्फे ६३ लसीकरण केंद्रे तर खासगी रुग्णालयांत ७३ केंद्रे अशी एकूण १३६ लसीकरण केंद्रे कार्यान्वित करण्यात आलेली आहेत. मात्र, कोविड प्रतिबंधक लससाठा मर्यादित स्वरूपात प्राप्त होत असल्याने काही केंद्रांवर लसीकरण तात्पुरते थांबवावे लागत आहे. त्यातही दुसरी मात्रा (डोस) घेणाऱ्यांना प्राधान्य देणे क्रमप्राप्त असल्याने प्राप्त होणारा लससाठा लक्षात घेवून त्यानुसार दररोज लसीकरण मोहिमेचे नियोजन केले जात आहे.
वाचा:
मुंबईतील लसीकरण मोहीम अखंडितपणे सुरू ठेवण्यासाठी आवश्यक लससाठा उपलब्ध व्हावा म्हणून महानगरपालिका प्रशासन केंद्र सरकारकडे सातत्याने पाठपुरावा करत आहे. या अनुषंगाने आज रात्री उशिरापर्यंत सरकारकडून काही प्रमाणात लससाठा उपलब्ध होण्याची शक्यता आहे. आज रात्री लससाठा उपलब्ध झाला तर उद्या सकाळी लससाठा वितरित करण्यात येईल. त्यातून महानगरपालिका व शासकीय लसीकरण केंद्रावर लसीकरण सुरू करण्यास उशीर होवू शकतो, असेही नमूद करण्यात आले आहे.
वाचा:
मुंबई महानगरपालिकेला २५ एप्रिल पर्यंत एकूण २४ लाख ५८ हजार ६०० इतक्या लस उपलब्ध झाल्या. त्यापैकी २४ लाख १० हजार ८६० लस उपयोगात आल्या. आज दुपारी दोन वाजेपर्यंत ४७ हजार ७४० इतका लससाठा संबधित केंद्रावर शिल्लक होता. लसीकरणाचा वेग लक्षात घेता हा लससाठा आजच पूर्णतः उपयोगात येण्याची शक्यता आहे. म्हणून लस उपलब्धतेबाबतची सद्यस्थिती लक्षात घेता सर्व संबंधितांनी महानगरपालिका प्रशासनाला व आरोग्य यंत्रणेला सहकार्य करावे, अशी विनंती पालिकेने केली आहे.
वाचा:
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
