राज्यात कोरोनाच्या नावाखाली आरोग्य विभागात मोठ्या प्रमाणात नागरिकांची फसवणूक होत असल्याचे अनेक प्रकार समोर आले. यामध्ये रेमडेसिविर काळाबाजारही सुरू आहे. याच प्रकरणात ताब्यात घेतलेला आरोपी फरार झाल्याने पोलीस उपनिरीक्षकाला याची मोठी किंमत मोजावी लागली.
मिळालेल्या माहितीनुसार, काही दिवसांपूर्वी नागपूरच्या पाचपावली पोलीस स्टेशनमधून रेमडेसिविर इंजेक्शनच्या काळाबाजारा प्रकरणी आरोपी उबेद राजा इकराम उल हक ( मेडिकल स्टर्स मालक ) फरार झाला होता. पोलीस उपनिरीक्षक मनीष गोडबोले यांनी आरोपी ताब्यात असताना त्याच्याकडे नीट लक्ष घातलं नाही आणि त्यामुळे तो हातून निसटला असं तपासात समोर आलं. त्यामुळे पोलीस आयुक्त अमितेश कुमार यांनी आज पोलीस उपनिरीक्षक मनीष गोडबोलेला निलंबित केलं आहे.
खरंतर, कोरोनामुळे प्रत्येक ठिकाणी सर्वसामान्य नागरिकांची फसवणूक होत असल्याच्या अनेक घटना समोर आल्या आहेत. आधीच लॉकडाऊनमुळे अर्थव्यवस्था कोलमडली आहे. त्यात कोरोना झपाट्याने पसरत असल्यामुळे मृतांची संख्याही वाढत आहे. या सगळ्यात आरोग्य़ व्यवस्थेवर ताण आला आहे. औषधं, व्हेंटिलेटर, ऑक्सिजन, बेड्स आणि आता लसींचाही तुडवडा झाल्यामुळे राज्यात भीषण परिस्थिती आहे. त्यात पोलिसही जर अशा प्रकारे काम करणार असतील तर यामध्ये सामान्य जनतेचं आणखी नुकसान आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
