शिर्डी: रिक्षा बाजूला घेतला नाही म्हणून अंगावर गाडी घातली!

अहमदनगरः शिर्डीमध्ये रस्त्यावरील रिक्षा बाजूला न घेतल्याच्या कारणातून रिक्षाचालकाला मारहाण करून त्याच्या अंगावरून चारचाकी घालून खून करण्याचा प्रकार घडला आहे. सुरुवातीला हा अपघात असल्याचे भासविण्यात आले होते. परंतु प्रत्यक्षात खून करण्यात आलेला आहे. त्या भागातील सीसीटीव्ही कॅमेऱ्याच्या फूटेजमध्ये ही घटना दिसत आहे.

वाचा:

विठ्ठल मोरे असे खून झालेल्या रिक्षाचालकाचे नाव आहे. या प्रकरणी श्रीकांत राजू शिंदे याच्याविरुद्ध खून करणे, अॅट्रॉसिटी कायद्यानुसार गुन्हा नोंदविण्यात आला आहे. आरोपी श्रीकांत शिंदे याला पोलिसांनी अटक केली आहे. शिर्डीचे माजी नगरसेवक राजू शिंदे यांचा ते मुलगा आहे. बुधवारी मध्यरात्री शिर्डीतील पिंपळवाडी रोडजवळील हॉटेल संजीवनीसमोर रिक्षाचालक विठ्ठल साहेबराव मोरे याने रिक्षा रस्त्यावर लावली होती. ती रिक्षा बाजूला घेण्यावरून रिक्षाचालक मोरे व श्रीकांत शिंदे यांच्यामध्ये वाद झाले. त्यातून शिंदे याने मोरे याला मारहाण करत त्याचे डोके लोखंडी खांबाला आदळवले. त्यात मोरे हा गंभीर जखमी झाला. त्यानंतर शिंदे याने मोरे याला रस्त्यावर टाकून त्याच्या अंगावर इनोव्हा गाडी घातली व नंतर अपघात झाला असल्याचा बनाव रचला. ही माहिती पोलिसांना मिळाल्यानंतर त्यांनी सीसीटीव्ही कॅमेऱ्यांचे फुटेज तपासले तेव्हा हा अपघात नसून, खून असल्याचे उघडकीस आले. त्यानंतर शिंदे याच्याविरुद्ध खून करणे, अॅट्रॉसिटी कलमानुसार गुन्हा नोंदवून त्याला गुरुवारी दुपारी अटक करण्यात आली.