श्वेता जैस्वाल या शिराळा प्राथमिक आरोग्य केंद्रांतर्गत नरसिंगपूर उपकेंद्रात कार्यरत आहेत. त्यांची बहिण पुणे येथील रूग्णालयात दाखल होत्या व उपचारादरम्यान त्यांचे निधन झाले. सख्खी बहिण जाण्याची वेदना मोठी होती. पण श्वेताताईंनी स्वत:ला सावरले व कर्तव्याला प्राधान्य दिले. श्वेताताई या आरोग्यसेविका म्हणून लसीकरणाची महत्वपूर्ण जबाबदारी पार पाडत आहेत.
करोनाकाळात आरोग्य यंत्रणेसमोर अनेक अडचणी येत आहेत. उपलब्ध मनुष्यबळाचे नियोजन करून अहोरात्र अनेक कामे पार पाडावी लागत आहेत. करोना महामारी हे अखिल मानवजातीवरचे संकट आहे. अशा काळात वैयक्तिक दु:ख बाजूला सारून श्वेताताईंनी कर्तव्यनिष्ठेचा आदर्श घालून दिला.
आपल्या दु:खाला वाट मोकळी करून देताना श्वेता जयस्वाल सांगतात की, ‘बहिण जाण्याचे दु:ख अत्यंत यातनादायी होते. मात्र, माझ्या कार्यक्षेत्रात कुणाच्याही कुटुंबात असे घडू नये, इतकाच माझा प्रयत्न आहे. माझी बहिण गेली. तसेच इतरांच्याही कुटुंबात कुणाची आई, कुणाची पत्नी, कुणाची मुलगी, तर कुणी पूर्ण कुटुंबच हरवून बसले. सगळी मानवजात संकटात असताना वैयक्तिक दु:खाने खचून जाण्याची ही वेळ नव्हती. म्हणून मी बहिणीच्या अंत्यविधीला ऑनलाईन उपस्थित राहिले आणि आरोग्यसेविका म्हणून माझे कर्तव्य बजावले.’
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
