मुलीने केली आईच्या प्रियकराची हत्या; लैंगिक छळाला त्रासून उचलले पाऊल

अनेकदा विनवण्या करून झाल्या, पोलिस तक्रारीही दिल्या. तरीही आईचा वासनांध प्रियकर सुधारत नव्हता. त्याचा छळ सहन न झाल्याने अल्पवयीन मुलीने अखेर त्याला संपविले. या मुलीचा संताप इतका अनावर झाला की तिने मारलेल्या लाकडी दांड्याच्या एका दणक्यात आईच्या त्या प्रियकराने जीव सोडला. हिंगणा पोलिस ठाण्याच्या हद्दीतील सावली येथे सोमवारी सकाळी हा थरार घडला. (fed up with harassment the girl takes away the life of of her mother)

ज्ञानेश्वर गटकर (वय ६०) असे मृताचे नाव आहे. तो वर्धा जिल्ह्यातील सेलू येथील रहिवासी होता. पोलिसांनी दिलेल्या माहितीनुसार, याप्रकरणातील ही सतरावर्षीय मुलगी सावली गावात तिच्या आईसह राहते. ती अकरावीची विद्यार्थिनी आहे. लहानपणीच तिचे वडील वारले. तिची आई शेतमजूर आहे. ज्ञानेश्वर हा सावली येथील त्यांच्या घरी तिच्या आईसोबत लिव्ह इन रिलेशनशिपमध्ये राहत होता. त्याची या मुलीवर आधीपासूनच वाकडी नजर होती. सोमवारी सकाळी ११.३० वाजताच्या सुमारास ज्ञानेश्वर दारू पिऊन घरी आला. त्याने परत एकदा या मुलीशी अंगलट सुरू केली. मुलीने बराच प्रतिकार केला. तरीही तो काहीही ऐकत नव्हता. अखेर मुलीचा संताप अनावर झाला. तिचा ज्ञानेश्वरशी वाद सुरू झाला. याच रागाच्या भरात तिने लाकडी दांडा उचलून ज्ञानेश्वरच्या तोंडावर मारला. ज्ञानेश्वर घराच्या अंगणातच खाली पडला. अधिक रक्तस्रावामुळे त्याचा मृत्यू झाला. या घटनेची माहिती मिळताच हिंगणा पोलिस ठाण्याचे वरिष्ठ पोलिस निरीक्षक सरीन दुर्गे व इतर कर्मचारी घटनास्थळी दाखल झाले. पोलिसांनी ज्ञानेश्वरचा मृतदेह उत्तरीय तपासणीसाठी पाठविला असून या सतरावर्षीय मुलीला ताब्यात घेतले आहे.

विनयभंगाची शिक्षाही भोगली होती…

विशेष म्हणजे, २०१५मध्ये मुलीने आईचा प्रियकर ज्ञानेश्वरविरोधात विनयभंगाची तक्रार दिली होती. त्याच्यावर विनयभंगाच्या आरोपाखाली गुन्हा दाखल करण्यात आला होता आणि पुढे त्याला शिक्षाही झाली होती. फेब्रुवारीमध्ये तो तुरुंगातून बाहेर आला होता. त्यानंतर एप्रिलमध्ये सावली येथे परतला आणि परत एकदा त्यांच्यासोबत राहू लागला. मुलीवर त्याची वाईट नजर आहे, याची कल्पना तिच्या आईला होती. त्याचवेळी त्याला रोखले गेले असते तर ही घटना घडली नसती. मात्र, इथे नीतीमत्ता गळून पडली होती.