लसीकरणः करोनावरील लसीचे ४८ लाख डोस राज्यांना ३ दिवसांत मिळणार

नवी दिल्लीः राज्ये आणि केंद्र शासित प्रदेशांकडे सध्या करोनावरील लसीचे १.८० कोटी डोस उपलब्ध आहेत. येत्या ३ दिवसांत राज्यांना आणखी ४८ लाख डोस मिळतील, अशी माहिती केंद्रीय आरोग्य मंत्रालयाकडून देण्यात आली.

राज्यांना आतापर्यंत २१.८० कोटी डोसचा पुरवठा

राज्ये आणि केंद्र शासित प्रदेशांना आतापर्यंत मोफत आणि प्रत्यक्ष खरेदीतून करोनावरील लसीचे २१.८० कोटी डोस उपलब्ध करून देण्यात आले आहेत. यापैकी २० कोटी डोसचा उपयोग झाला आहे. यात अपव्यय झालेल्या डोसेसचाही समावेश आहे, असं मंत्रालयाने सांगितलं.

लसीकरण मोहीमेत आतापर्यंत १९.८४ कोटी डोस दिले

सोमवारी रात्री ८ वाजेपर्यंत लसीकरण मोहीमेत आतापर्यंत १९.८४ कोटी नागरिकांना लस देण्यात आली आहे. लसीकरण मोहीमेतला हा १२९ वा दिवस होता. सोमवारी २३.६५ लाख जणांना लस देण्यात आली. यापैकी २१.९० लाख जणांना पहिला तर १.७४ लाख जणांना दुसरा डोस दिला गेला.

६० वर्षांहून अधिक वयाच्या ५.६८ कोटी नागरिकांना पहिला आणि १.८३ कोटी नागरिकांना दुसरा डोस दिला गेला आहे. तर ४५ ते ६० वर्षांच्या ६.१५ कोटी नागरिकांना पहिला आणि जवळपास एक कोटी नागरिकांना दुसरा डोस देण्यात आला आहे. याशिवाय लस घेणाऱ्यांमध्ये आरोग्य कर्मचारी आणि फ्रंटलाइन वर्कर्सचाही समावेश आहे.