दुर्गम भागात करोनाचा शिरकाव; दोन केंद्रीय समिती सदस्यांसह १२ माओवादी करोनाबाधित

गडचिरोली: माओवाद्यांचा समुहात करोना विषाणूने धुमाकूळ घातला आहे. तेलंगाणात अटक केलेल्या माओवादी नेता गड्डम मधुकरवर सुरू असलेल्या उपचारावरून हे सिद्ध झालं आहे. तसंच, आणखी काही माओवादी या प्राणघातक विषाणूला बळी पडल्याचीही माहिती आहे. इतकंच नव्हेतर,दोन केंद्रीय समिती सदस्यांसह असून त्यांची करोनाशी झुंज सुरू असल्याची धक्कादायक माहिती समोर आली आहे.

मंगळवारी गड्डम मधुकर या माओवादी नेत्याला अटक केल्यावर वरंगलचे पोलीस आयुक्त डॉ. तरुण जोशी यांनी बुधवारी पत्रकार परिषदेत माहिती देताना सांगितले की, मधुकर हा गेल्या अनेक दिवसांपासून कोविड संसर्गामुळे त्रस्त होता आणि तो एका अल्पवयीन मुलाच्या मदतीने उपचारासाठी वरंगलला येत होता. मटवाडा पोलिसांनी मुलुगु चौकात वाहन तपासणी दरम्यान दंडकारण्यातील विभागीय समितीचा सचिव गड्डम मधुकर आणि एक अल्पवयीन कुरिअर बॉय (१८) याला अटक केली आहे.

उपचारासाठी घेतली अल्पवयीन मुलाची मदत

माओवादी नेता गड्डम मधुकरला उपचारासाठी मदत करणारा अल्पवयीन मुलाने मध्येच पॉलिटेक्निक डिप्लोमाचा शिक्षण बंद केला होता आणि पोटाची खडगी भरण्यासाठी कार ड्रायव्हर म्हणून काम सुरू केले होते. दरम्यान या अल्पवयीन मुलाची जमीन वादविवादाच्या प्रकरणात नमिंदला नरेशशी मित्र जसवंत यांनी ओळख करून दिली होती. नरेशने ३१ मे रोजी त्या अल्पवयीन मुलाला बोलावून हणमाकोंडा येथील रुग्णालयात मधुकरवर उपचार करण्यासाठी मदत करण्यास सांगितले. यानंतर हा अल्पवयीन मुलगा कारमधून एटूरूनागारम मार्गे व्यंकटपुरम वनक्षेत्रात गेला आणि हनमाकोंडाला परत येत असताना पोलिसांनी कारची झडती घेतली असता मधुकर कारच्या डिकीत पडला होता. पोलिसांनी या दोघांना अटक केले असून त्यांच्याकडून ८८ हजार रुपये रोकड जप्त केली. मधुकर यांना उपचारासाठी रुग्णालयात दाखल करण्यात आले असून त्याच्यावर उपचार सुरू आहे.

नातेवाईकांना मधुकर यांच्या प्रकृतीची चिंता

मधुकर हा कुमुरमभीम (आसिफाबाद) जिल्ह्यातील बेज्जूर तालुक्यातील कोंडापल्ली गावचा मूळ रहिवासी असून १९९९ मध्ये तत्कालीन पीपल्स वॉर (पी डब्ल्यू) च्या सिरपूर दलममध्ये ते सामील झाला होता. वरिष्ठांच्या निर्देशानंतर त्यांना दंडकारण्य स्पेशल झोन कमिटीमध्ये हलविण्यात आले. त्यानंतर पोलिस कर्मचार्‍यांना ठार मारणे आणि शस्त्रे हिसकावणे यासह अनेक गुन्ह्यांमध्ये त्याचा सहभाग होता.

गड्डम मधुकर उर्फ मोहन उर्फ सोबरॉय यांच्या कुटुंबियांनी करोनाबाधित असल्याने त्यांच्या प्रकृतीची चिंता व्यक्त केली. माओवादी नेता मधूकरचे वडील बापू, सावत्र आई दुर्गाक्का, भाऊ सुधाकर, राजू आणि बाग्या यांनी त्यांच्या प्रकृतीबद्दल चिंता लागून राहिली असून त्यांना चांगले वैद्यकीय उपचार मिळावे यासाठी पावले उचलण्याची विनंती पोलिस अधिकाऱ्यांना केली आहे.

मधुकर यांनी आपले शिक्षण मध्येच सोडत वयाच्या अवघ्या १८ वर्षी माओवादी विचारसरणीकडे आकर्षित झाले आणि १९९९ मध्ये ते या संघटनेत सामील झाले. त्यांचे कुटुंबातील सदस्य त्याला बर्‍याच काळापासून पोलिसांसमोर शरण जाण्याची विनंती करत होते. बापू वयानुसार आरोग्याच्या समस्येने ग्रस्त आहेत, अशी माहिती त्यांच्या नातेवाईकांनी दिली आहे.