डोनाल्ड ट्रम्प हे लवकरच भारत दौऱ्यावर येत आहेत. भारत दौऱ्यादरम्यान ते अहमदाबादला भेट देणार आहेत. तिथं त्यांच्या स्वागतासाठी ” या कार्यक्रमाचं आयोजन करण्यात आलंय. ट्रम्प यांच्या अहमदाबाद भेटीच्या पार्श्वभूमीवर शहरात रंगरंगोटीची कामं सुरू आहेत. झोपड्यांसमोर भिंती उभारल्या जात आहेत. या सर्व घडामोडींवर शिवसेनेचं मुखपत्र दैनिक ‘सामना’तून उपरोधिक भाष्य करण्यात आलंय. मुळात ट्रम्प यांना दिल्लीत आधी न उतरवता थेट अहमदाबादेत उतरवून केंद्र सरकारला नक्की कोणता संदेश द्यायचा आहे, असा सवाल शिवसेनेनं केलाय. मोदी हे सगळ्यात मोठे ‘विकासपुरुष’ आहेत. त्यांच्या आधी या देशात कोणी विकास केला नाही व बहुधा नंतरही कोणी करणार नाही, असा खोचक टोलाही अग्रलेखातून लगावण्यात आला आहे.
वाचा:
अग्रलेखातील ठळक मुद्दे:
>> गुलाम हिंदुस्थानात इंग्लंडचा राजा किंवा राणी येत असत तेव्हा त्यांच्या स्वागतासाठी अशी लगीनघाई होत असे व जनतेच्या तिजोरीतून हा मोठा खर्च केला जात असे. ट्रम्प यांच्याबाबतीत हेच घडत आहे व आपल्या ‘गुलाम’ मानसिकतेचे लक्षण या लगीनघाईतून दिसत आहे.
>> ट्रम्प हे कोणी जगाचे ‘धर्मराज’ किंवा ‘मि. सत्यवादी’ नक्कीच नाहीत. ते एक अतिश्रीमंत उद्योगपती, भांडवलदार आहेत व आपल्याकडे ज्याप्रमाणे बडे उद्योगपती राजकारणात शिरतात किंवा राजकारण पैशांच्या जोरावर मुठीत ठेवतात त्याच विचारसरणीचे असे प्रे. ट्रम्प आहेत.
>> ट्रम्प हे काही फार मोठे बुद्धिवादी, प्रशासक, जगाच्या कल्याणाचा विचार करणारे आहेत काय? नक्कीच नाहीत, पण सत्तेवर बसलेल्या माणसाकडे शहाणपणाची गंगोत्री आहे हे गृहीत धरूनच जगास व्यवहार करावे लागतात.
>> मोदी यांनी ट्रम्प यांना आधी गुजरातमध्ये नेण्याचे ठरवले व त्यांच्या निर्णयाचा आदर केला पाहिजे. ट्रम्प अहमदाबाद विमानतळावर उतरतील. त्यामुळे विमानतळ, विमानतळाबाहेरचे रस्ते यांची ‘मरम्मत’ सुरू आहे. ही ‘मरम्मत’ करण्यासाठी प्रे. ट्रम्प यांचे पाय अहमदाबादला लागणे हे ऐतिहासिकच म्हणायला हवे.
>> ट्रम्प हे फक्त तीन तासांच्या भेटीवर येत आहेत व त्यासाठी शंभर कोटींवर खर्च सरकारी तिजोरीतून होत आहे. १७ रस्त्यांचे डांबरीकरण सुरू आहे, नवे रस्ते बांधले जात आहेत, पण सगळ्यात गंमत अशी की, प्रे. ट्रम्प यांना अहमदाबादच्या रस्त्यांच्या कडेला असलेल्या बकाल गरीबांच्या झोपडय़ांचे दर्शन होऊ नये म्हणून रस्त्याच्या दोन्ही बाजूला ‘गडकोट’ किल्ल्यास तटबंदी असावी तशा भिंती उभारण्याचे काम सुरू आहे.
>> ट्रम्प यांच्या नजरेतून गुजरातची गरिबी, झोपड्या सुटाव्यात यासाठी ही ‘राष्ट्रीय योजना’ हाती घेतल्याची टीका सुरू आहे. ट्रम्प यांना देशाची दुसरी बाजू दिसू नये यासाठी काय हा खटाटोप? प्रश्न इतकाच आहे, मोदी हे पंधरा वर्षे गुजरात राज्याचे ‘बडा प्रधान’ व आता पाच वर्षे संपूर्ण देशाचे ‘बडा प्रधान’ असतानाही गुजरातची गरिबी आणि बकालपण लपवण्यासाठी भिंती उभारण्याची नामुष्की का यावी?
वाचा:
>> मोदी यांचा जयजयकार करण्यासाठी लोकसभा निवडणुकीआधी अमेरिकेत ‘हाऊ डी मोदी’ कार्यक्रमाचे आयोजन करण्यात आले होते. त्यास प्रे. ट्रम्प यांनी हजेरी लावली होती. आता अमेरिकेत राष्ट्राध्यक्षपदाची निवडणूक आली आहे व गुजरातमध्ये ‘फिट्टमफाट’ म्हणून ‘केम छो ट्रम्प’ कार्यक्रमाचे आयोजन केले आहे. ही सरळ राजकीय योजना आहे. गुजरातचे अनेक लोक अमेरिकेत आहेत. त्यांना आकर्षित करण्यासाठी प्रे. ट्रम्प यांच्यासाठी ‘केम छो ट्रम्प’चा खेळ मांडला असला तरी त्यास राजकीय विरोध होऊ नये.
>> ट्रम्प हे अमेरिकेचे राष्ट्राध्यक्ष म्हणून आपल्या देशात येत आहेत. त्यांच्या स्वागतात कोणतीही कसर राहू नये. शेवटी हा राजकीय शिष्टाचार आहे. ‘केम छो ट्रम्प’ने ते खूश होतील, पण आपला देश विविधतेने नटलेला आहे हे अमेरिकेच्या सध्याच्या राष्ट्राध्यक्षांना समजायला हवे.
>> मागे ‘गरिबी हटाव’ या घोषणेवरून बरीच टिंगलटवाळी झाली होती. त्याच घोषणेचे रूपांतर आता ‘गरिबी छुपाव’ या योजनेत झालेले दिसते. नव्या अर्थसंकल्पात त्यासाठी स्वतंत्र आर्थिक तरतूद केली आहे काय? संपूर्ण देशात अशा भिंती उभारण्यासाठी अमेरिका हिंदुस्थानला कर्ज देणार आहे काय?
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
