दिवसाढवळ्या पेट्रोल पंपावर सशस्त्र लूट; कर्मचारी जखमी, तीन लुटारू गजाआड

नागपूर: वर्धा मार्गावरील उज्ज्वलनगर परिसरातील पेट्रोलपंपावरील कर्मचाऱ्यावर चाकूने हल्ला करून लुटपाट करण्यात आली. ही घटना गुरूवारी दुपारी १ वाजताच्या सुमारास घडली. दिवसाढवळ्या घडलेल्या या घटनेने खळबळ उडाली आहे. सोनेगाव पोलिसांनी शोध घेऊन तीन लुटारूंना अवघ्या तीन तासांत अटक केली. अजय ऊर्फ मोनू जग्गू यादव (वय २२ रा. शिवनगाव), अनिल शंकर वानखेडे (वय २९, रा. सोमवालवाडा), रूपेश वरणकर (वय २८ रा. पंचदीपनगर), अशी अटकेतील लुटारूंची नावे आहेत. रूपेश याच्याविरुद्ध मारहाणीचे गुन्हे दाखल आहेत. (petrol pump looted in nagpur employees injured and three arrested)

वर्धा मार्गावरील उज्ज्वलनगर येथे रोहन सतीश राठोड यांचे आशिष नावाचे पेट्रेाल पंप आहे. गुरूवारी दुपारी १ वाजता दिवाकर नवलकिशोर तिवारी (वय ४४ रा.मनीषनगर) हे पंपावर काम करीत होते. याचवेळी तोंडाला कापड बांधलेले तीन युवक मोटारसायकलवर आले. त्यांनी दिवाकर यांच्यावर चाकूने वार केले. त्यांच्याकडील एक हजारांची रोख हिसकावली व पसार झाले. दिवसाढवळ्या घडलेल्या या घटनेने पोलिसांमध्ये खळबळ उडाली.

क्लिक करा आणि वाचा-
घटनेची माहिती मिळताच पोलिस उपायुक्त नुरूल हसन, महिला पोलिस निरीक्षक वर्षा देशमुख, उपनिरीक्षक टी.एम.ढाकुलकर, हेडकॉन्स्टेबल राजेश, नरेश, सुशील, मुकेश, अनिल व रवींद्र यांच्यासह पोलिसांचा ताफा तेथे पोहोचला. पोलिसांनी सीसीटीव्ही फुटेजची पाहणी केली. अवघ्या तीन तासांत सोनेगाव पोलिसांनी तीन लुटारूंना अटक केली. त्यांच्याकडून मोटारसायकल, चाकू व एक हजारांची रोख जप्त केली.

क्लिक करा आणि वाचा- क्लिक करा आणि वाचा-