करोनाची लस न घेतल्यास सिम कार्ड ब्लॉक; 'या' सरकारचा निर्णय

इस्लामाबाद: करोना महासाथीच्या आजाराला अटकाव करण्यासाठी विविध पातळीवर प्रयत्न करण्यात येत आहे. अनेक देशांमध्ये करोना लसीकरणाला प्राधान्य दिले जात आहे. करोना लसीकरणाचा वेग वाढवण्यासाठी अनेक ठिकाणी विविध प्रलोभने दाखवण्यात येत आहेत. मात्र, पाकिस्तानमध्ये थेट सिम कार्ड ब्लॉक करण्याची धमकी सरकारने दिली आहे. पंजाब सरकारने याबाबतची घोषणा केली आहे

स्थानिक माध्यमांनी दिलेल्या वृत्तानुसार, पंजाब प्रांताचे आरोग्यमंत्री डॉ. यास्मीन रशीद यांच्या अध्यक्षतेखाली एक बैठक पार पडली. या बैठकीतील निर्णयानुसार, करोना प्रतिबंधक लस न घेणाऱ्या व्यक्तींचे सिम कार्ड ब्लॉक करण्यात येणार आहे. या बैठकीत नागरी आणि लष्करी सेवांमधील अधिकारी उपस्थित होते. येत्या १२ जूनपासून १८ वर्षांवरील लोकांसाठी ‘वॉक-इन वॅक्सीनेशन’ प्रमाणे लसीकरण सुरू करण्यात येणार आहे. येत्या वर्षअखेरपर्यंत पाकिस्तानने ७० दशलक्ष लोकांचे लसीकरण करण्याचे उद्दिष्ट ठेवले आहे.

वाचा:

वाचा:
सरकारच्यावतीने धार्मिक स्थळांबाहेर लसीकरण केंद्र, शिबीर सुरू करण्यात येणार आहे. लसीकरणात कर्करोग आणि एड्सबाधित व्यक्तींना प्राथमिकता दिली जाणार आहे. सरकारने सांगितले की, लस घेतल्यानंतरच लोकांना सिनेमा, रेस्टॉरंट्स आणि विवाहसोहळ्यांमध्ये उपस्थित राहता येणार आहे.

पाकिस्तानने चीनच्या मदतीने देशात लस उत्पादन सुरू केले आहे. त्याची पहिली खेप काही दिवसांपूर्वीच लाँच करण्यात आली. पाकिस्तानने आपल्या लशीचे नाव पाकवॅक असे ठेवले आहे. पाकिस्तान लसीकरणासाठी पाकवॅकसह चीनकडून आणि कोवॅक्स योजनेतून मिळणाऱ्या लशींवर अवलंबून असल्याचे म्हटले जाते.