शुक्रवार, ११ जून रोजी हा प्रकार घडला होता. जाफ्राबाद पोलीस ठाण्याचे पोलीस उपनिरीक्षक नितीन खुशालसिंग काकरवाल, उपनिरीक्षक युवराज सुभाष पोठरे, हेड कॉन्स्टेबल मंगलसिंग रायसिंग सोळंके, सचिन उत्तमराव तिडके, शाबान जलाल तडवी हे दानवे यांच्या जनसंपर्क कार्यालयात गेले आणि झाडाझडती सुरू केली. दानवे यांचे कार्यालयप्रमुख उद्धव दुनगहू यांनी झाडाझडती घेण्यासाठी आपल्याकडं रितसर आदेश आहेत काय? अशी विचारणा पोलीस उपनिरीक्षक युवराज पोटरे यांच्याकडं केली. त्यावर त्यांना घाणेरड्या भाषेत शिवीगाळ करून धक्काबुक्की करण्यात आली, असा आरोप दुनगहू यांनी केला होता. इतकंच नव्हे, नागरिकांनी दिलेली निवेदने व विकासकामांबाबतचा महत्त्वाचा डेटा हे पोलीस घेऊन गेले.
वाचा:
रावसाहेब दानवे यांनी या संदर्भात पोलीस अधीक्षकांकडं तक्रार केली होती. कुठलीही कायदेशीर प्रक्रिया पूर्ण न करता एका संसद सदस्याच्या व केंद्रीय राज्यमंत्र्यांच्या कार्यालयाची झाडाझडती घेणे, कार्यायलयातील कर्मचाऱ्यांना शिवीगाळ करणे ही बाब संसदीय लोकशाहीला काळीमा फासणारी आहे. त्यामुळं माझी बदनामी झाली आहे. माझी प्रतिमा मलिन करण्यासाठीच पोलिसांनी ही कारवाई केली, असा आरोप दानवे यांनी तक्रारीत केला होता. पोलिसांच्या या कारवाईतून काय निष्पन्न झाले याचा खुलासा पोलीस खात्यानं करावा, अशी मागणी दानवे यांनी केली होती.
पोलीस अधीक्षकांनी या तक्रारीची गंभीर दखल घेत संबंधित पोलीस कर्मचाऱ्यांना निलंबित केलं आहे. बेशिस्त वर्तन व पोलीस खात्याची प्रतिमा जनसामान्यांमध्ये मलीन होण्यास कारणीभूत ठरल्याचा ठपका त्यांच्यावर ठेवण्यात आला आहे.
वाचा:
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
