लसीकरण फास्ट ट्रॅकवर! देशात सलग दुसऱ्या दिवशी दिले ६० लाखांहून अधिक डोस

नवी दिल्लीः देशात सलग दुसऱ्या दिवशी ६० लाखांहून अधिक नागरिकांना करोनावरील लस देण्यात आली ( ) आहे. cowin.gov.in वर गुरुवारी रात्री १२ वाजेपर्यंत ६०.६३ लाख नागरिकांनी लस घेतल्याची माहिती देण्यात आली. २१ जूनपासून देशात व्यापक लसीकरण मोहीम सुरू झाली आहे. गेल्या ४ दिवसांत २.७० कोटी नागरिकांना लस देण्यात आली आहे. २१ जूनला देशात विक्रमी ९०.८६ लाख, २२ जूनला ५४.२२ लाख, २३ जूनला ६४.८३ लाख डोस देण्यात आले.

देशात गुरुवारी सर्वाधिक ८.५१ लाख डोस हे उत्तर प्रदेशात दिले गेले. यापूर्वी २२ जूनलाही यूपीत ८ लाखांहून अधिक नागरिकांना लस दिली गेली होती. ७.४४ लाख डोस देत मध्य प्रदेश दुसऱ्या क्रमांकावर आहे. मध्य प्रदेशात ४ दिवसांत ३३ लाखांहून अधिक नागरिकांना लस देण्यात आली आहे. यात सर्वाधिक १७ लाख डोस २१ जूनला देण्यात आले होते.

याशिवाय गुजरात आणि महाराष्ट्रात ४-४ लाख डोस दिले गेले. ३ लाखाहून अधिक डोस हे कर्नाटक, तामिळनाडू आणि पश्चिम बंगालमध्ये दिले गेले. राजधानी दिल्लीत मागे अजून फक्त १.५७ लाख नागरिकांना लस दिली गेली.

४ दिवसांत ऑस्ट्रेलियाच्या लोकसंख्येहून अधिक नागरिकांचे लसीकरण

भारतात गेल्या ४ दिवसांत जेवढ्या नागरिकांचे लसीकरण झाले त्याहून अधिक लोकसंख्या फक्त ५० देशांमध्ये आहे. १८५ देशांची लोकसंख्या याहूनही कमी आहे. भारताने यादरम्यान ऑस्ट्रेलिया आणि उत्तर कोरियाच्या लोकसंख्येहून अधिक नागरिकांचे लसीकरण केले आहे. उत्तर कोरियाची लोकसंख्या ही २.५७ कोटी आहे तर ऑस्ट्रेलियाची लोकसंख्या २.५४ कोटी.