देशातील सर्वात मोठ्या तिकिट दलालाला अटक

बनावट ओळखपत्रे बनवून रेल्वे तिकिटे आरक्षित करणाऱ्या दलालाला अटक करण्यात पश्चिम रेल्वेच्या विशेष पथकाला यश आले आहे. या दलालाकडून तबबल ७.९७ कोटींची आरक्षित तिकिटे जप्त करण्यात आली. विशेष म्हणजे, तब्बल ५,८४८ बनावट ओळखपत्रे आरोपीकडे असल्याची धक्कादायक माहिती या तपासात समोर आली आहे.

मोठ्या प्रमाणात रेल्वे ईतिकिटे आरक्षित होत असल्याची माहिती मिळाली. या माहितीच्या आधारे इंटरनेटवरील ओळखपत्राद्वारे शोध घेतला असता ते ठिकाण सुरतमध्ये असल्याचे स्पष्ट झाले. या ठिकाणी छापा मारून अमित प्रजापती या संशयित व्यक्तीला ताब्यात घेण्यात आले आहे, असे रेल्वे अधिकाऱ्यांनी सांगितले.

या संशयित व्यक्तीने ५,८४८ ओळखपत्रांच्या मदतीने तिकिटे आरक्षित केली आहेत. त्याच बरोबर tatkalsoftware.co.in नावाचे संकेतस्थळ देखील तो चालवत असल्याची माहिती तपासादरम्यान मिळाली.

या सॉफ्टवेअरच्या मदतीने विविध अनधिकृत दलाल आयआरसीटीसीचे संकेतस्थळ हॅक करून तिकीट आरक्षित करत होते. हे संकेतस्थळ सुरू होताच काही सेकंदांत कन्फर्म तिकिटे आरक्षित करून ती प्रवाशांना वाढीव पैशांनी विकत होते, असे अधिकाऱ्यांनी स्पष्ट केले.

संशयीत आरोपीकडून २.५९ कोटी रुपये किंमत असलेली एकूण ८,५६९ प्रवास करण्यायोग्य तिकिटे जप्त करून ती रद्द करण्यात आली आहेत. या संशयिताने सद्यस्थितीत ७.९७ कोटींची एकूण २९,२२८ तिकिटे आरक्षित केल्याची माहिती चौकशीतून समोर आली आहे. या प्रकरणी अमित प्रजापतीला सात दिवसांची आरपीएफ कोठडी ठोठावण्यात आली आहे.

नोव्हेंबर २०१९ मध्ये अमित दुबईला गेला होता. तो दुबईला का गेला, तेथे कोणाला भेटला, देशातील कोणकोणत्या भागात त्याचे जाळे पसरले आहे, याबाबत तपास सुरू असल्याचे रेल्वे सुरक्षा बलाच्या अधिकाऱ्यांनी स्पष्ट केले.