हिंगणघाट प्रकरण: आरोपीचा आत्महत्येचा प्रयत्न?

पंधरवड्यापूर्वी हिंगणघाट येथे प्राध्यापिकेला जिवंत जाळून ठार मारणारा मारेकरी विकेश उर्फ विक्की नगराळे (वय २७ रा. दारोडा) याने बुधवारी नागपूर कारागृहात आत्महत्येचा प्रयत्न केल्याचे वृत्त आहे. कारागृह प्रशासनाने मात्र यास नकार दिला आहे. विकेश नागपूर मध्यवर्ती कारागृहातील विशेष बराकीत आहे.

सूत्रांनी दिलेल्या माहितीनुसार, थंडीपासून बचाव करण्यासाठी विकेशला ब्लँकेट देण्यात आले आहे. बुधवारी दुपारी त्याने हे ब्लँकेट फाडले. त्याची एक चिंधी बराकीतील गजाला बांधली आणि ती गळ्यात अडकवून फास लावण्याचा प्रयत्न केला. हा प्रकार तिथे तैनात असलेल्या सुरक्षारक्षकाच्या लक्षात आला. त्याने वेळीच धाव घेत विकेशच्या गळ्याभोवतीचा फास ढिला केला. यानंतर त्याला कारागृहातील रुग्णालयात दाखल करण्यात आले. सध्या त्याची प्रकृती धोक्याबाहेर आहे, असे कळते. या घटनेबाबत कारागृह प्रशासनाशी संपर्क साधला असता, विकेशने आत्महत्येचा कुठलाही प्रयत्न केला नाही. त्याच्या आत्महत्येचे वृत्त चुकीचे असल्याचा दावा केला.

विकेशने ३ फेब्रुवारी रोजी हिंगणघाटमधील नंदोरी चौकात प्राध्यापिकेच्या अंगावर पेट्रोल टाकून तिला जाळले होते. गंभीर जखमी पीडितेला उपचारासाठी नागपुरात हलविण्यात आले होते. तिला वाचविण्याचे डॉक्टरांनी शर्थीचे प्रयत्न केले. मात्र तिची मृत्यूशी झुंज अपयशी ठरली. १० फेब्रुवारी रोजी तिचा मृत्यू झाला. या घटनेने महाराष्ट्र हादरला. संतप्त पडसाद उमटले. जनक्षोभ उसळला. पीडितेवरील अंत्यसंस्काराच्या दिवशी तिच्या गावी, दारोडा येथे गावकऱ्यांचा असंतोष उफाळून आला होता. आरोपीला कठोर शिक्षा झाली पाहिजे, शिक्षेवर तातडीने अंमलबजावणी झाली पाहिजे, अशी मागणी रेटली जात आहे.

‘मला गोळ्या घाला’

एकतर्फी प्रेमातून प्राध्यापिकेला जिवंत जाळण्याच्या घटनेतील आरोपीने ‘मला जिवंत राहण्याचा अधिकार नाही’, असे बोलून दाखविले होते. मला गोळ्या घालून ठार मारा, असा संतापही त्याने व्यक्त केल्याची माहिती आहे. त्यामुळे विकेशवर विशेष लक्ष ठेवले जात आहे. आरोपीच्या जीवितास धोका बघता त्याला विविध पोलिस ठाण्यांत ठेवले जात होते. अखेरीस त्याला वर्धा कारागृहातून १२ फेब्रुवारीला नागपूरच्या कारागृहात हलविण्यात आले. सुरक्षा रक्षकांची त्याच्यावर चोवीस तास पाळत आहे. अन्य कैद्यापासून त्याला दूर ठेवण्यात आले आहे. त्याची न्यायालयीन कोठडी आज, गुरुवारी संपत आहे.