चर्चेत
गुजरातचा रहिवासी असलेल्या या व्यक्तीचं नाव आहे रमेशचंद्र फेफर…. रमेशचंद्र गुजरातच्या जलसंपदा विभागात इंजिनिअर म्हणून कार्यरत होते. वेळेपूर्वीच सेवानिवृत्त झालेल्या फेपर आपल्या ग्रॅच्युईटीचे पैसे लवकरात लवकर मिळण्यासाठी प्रयत्न करत आहेत.
रमेशचंद्र फेफर यांनी जलसंपदा विभागाच्या सचिवांना १ जुलै रोजी एक पत्र लिहिलंय. ‘सरकारमध्ये बसलेल्या राक्षसांनी आपली १६ लाख रुपयांची ग्रॅच्युईटी आणि एका वर्षाचं १६ लाख रुपयांचं वेतन रोखून त्रास देण्याचा प्रयत्न केला’ असा आरोप फेफर यांनी या पत्रात केलाय. सोबतच, मी भगवान विष्णूचा दहावा अवतार ” आहे, मला त्रास दिला तर जबरदस्ती दैवी शक्तींसहीत धरतीवर कडक दुष्काळ आणू शकतो, अशी धमकीवजा वाचाळ बडबडही फेफर यांनी केल्यानं ते चर्चेत आलेत.
‘…तर जगात दुष्काळ’
आपल्या रुपात भगवान ‘कल्की’ धरतीवर उपस्थित असल्यानंच गेल्या दोन वर्षांत भारतात चांगला पाऊस झाला. देशात एक वर्षही दुष्काळ पडला नाही. गेल्या २० वर्षात चांगला पाऊस झाल्यानं भारताला २० लाख कोटी रुपयांचा फायदा झाला. यानंतरही सरकारी राक्षस मला जाणून बुजून त्रास देत आहेत. याचमुळे यंदाच्या वर्षी संपूर्ण जगात कडक दुष्काळ सहन करायला भाग पाडू शकतो, असं रमेशचंद्र फेफर यांनी म्हटलंय.
जलसंसाधन विभागाचे सचिव एम के जाधव यांनी दिलेल्या माहितीनुसार, कार्यालयात हजेरी लावल्याशिवाय रमेशचंद्र फेफर वेतनाची मागणी करत आहेत. आपण केवळ ‘कल्की’चा अवतार आहोत आणि धरतीवर पाऊस पाडण्याचं काम करत आहोत म्हणून आपल्याला वेतन दिलं जावं, असा त्यांचा दावा आहे.
आठ महिन्यांत १६ दिवस कार्यालयात हजर
या अगोदरही ते २०१८ साली चर्चेत आले होते. त्यावेळीही त्यांनी स्वत: ला विष्णूचा अवतार घोषित करत कामावर येण्यास नकार दिला होता. त्यावेळी त्यांनी आठ महिन्यांच्या कालावधीत केवळ १६ दिवस कार्यालयात हजेरी लावली होती. यासाठी त्यांना कारणे दाखवा नोटीसही बजावण्यात आली होती. यानंतर रमेशचंद्र फेफर यांना सरकारी वेळेपूर्वीच सेवानिवृत्ती देण्यात आली होती.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
