मुंबई: भीमा-कोरेगाव हिंसाचार प्रकरणी साक्ष नोंदवण्यासाठी राष्ट्रवादी काँग्रेसचे अध्यक्ष यांना चौकशी आयोगानं समन्स बजावावं, अशी विनंती अॅड. प्रदीप गावंडे यांनी आयोगाकडे केली आहे. यासंबंधी त्यांनी आयोगाकडे एक अर्ज दाखल केला आहे.

भीमा-कोरेगाव येथे घडलेल्या हिंसाचार प्रकरणाची चौकशी करण्यासाठी आयोगाची स्थापना केली होती. कोरेगाव भीमा येथे १ जानेवारी २०१८ रोजी घडलेल्या घटनांचा क्रम आणि त्यासाठी कारणीभूत असलेली परिस्थिती याची कारणमीमांसा करणे, ही घटना घडवून आणण्यासाठी प्रत्यक्ष वा अप्रत्यक्षरीत्या व्यक्ती किंवा व्यक्तींचा गट किंवा संघटना कारणीभूत होत्या काय याचा शोध, या घटनेमुळे निर्माण झालेली परिस्थिती हाताळण्यासाठी जिल्हा प्रशासनाने आणि पोलिस यंत्रणेने कायदा-सुव्यवस्था राखण्यासाठी केलेले नियोजन व तयारी पुरेशी होती काय याचा आढावा तसेच ही परिस्थिती हाताळण्यासाठी पोलिसांकडून योग्य कारवाई झाली होती काय आदींची चौकशी केली जात आहे. याच आयोगानं आता शरद पवार यांना या प्रकरणी तात्काळ साक्ष नोंदवण्यासाठी बोलवावं, अशी मागणी अॅड. गावंडे यांनी अर्जाद्वारे केली आहे.