म. टा. विशेष प्रतिनिधी,
‘मुंबई-गोवा महामार्गावर सध्याच्या पावसाळी दिवसांत अपघाताच्या घटना घडू नयेत याची चिंता आहे. त्यामुळे महामार्गावरील सर्व खड्ड्यांच्या ठिकाणी डागडुजी करण्याचे काम लवकरात लवकर पूर्ण करा. तसेच ठिकठिकाणी चुकीचे किंवा अप्रमाणित गतिरोधके असल्यास त्यांचे काम करण्यासह अशा गतिरोधकांच्या ठिकाणी पांढऱ्या रंगाच्या पट्ट्या वगैरे उपाययोजना तत्परतेने करा’, असे निर्देश मुंबई उच्च न्यायालयाने शुक्रवारी राज्य सरकार व भारतीय राष्ट्रीय महामार्ग प्राधिकरणाला (एनएचएआय) दिले.

‘सध्या पावसाळी दिवस असल्याने वाहनचालकांची कोणत्याही प्रकारे गैरसोय होणार नाही आणि कुठेही धोका निर्माण होणार नाही, याची काळजी महामार्गावरील संबंधित प्रत्येक ठिकाणी घेऊन आवश्यक उपाय करावेत. तसेच महामार्गावरील खड्डे भरण्याचे काम किती पूर्ण झाले याचा तपशील २७ ऑगस्ट रोजी प्रगती अहवालात द्यावा’, असे निर्देशही मुख्य न्यायमूर्ती दीपांकर दत्ता व न्या. गिरीश कुलकर्णी यांच्या खंडपीठाने राज्य सरकार व एनएचएआयला दिले.

२०१०मध्ये या महामार्गाच्या रुंदीकरणाचा प्रकल्प सुरू होऊनही काम संथगतीने सुरू असल्याचे आणि अनेक ठिकाणी दर्जेदार काम होत नसल्याचे निदर्शनास आणणारी जनहित याचिका उच्च न्यायालयातील वकील अॅड. ओवेस पेचकर यांनी केली आहे. याचिकेची दखल घेत खंडपीठाने राज्य सरकारला कामाची प्रगती दाखवण्याचे निर्देश दिले होते. त्यानुसार, सार्वजनिक बांधकाम विभागाचे (महामार्ग विभाग) कार्यकारी अभियंता श्रीकांत बांगर यांनी महाधिवक्ता आशुतोष कुंभकोणी यांच्यामार्फत प्रतिज्ञापत्रासह माहिती सादर केली. ती पाहिल्यानंतर महामार्ग रुंदीकरणाचा प्रकल्प डिसेंबर-२०२२पर्यंत पूर्ण करण्याच्या दृष्टीने बऱ्यापैकी प्रगती झाली असल्याचे निरीक्षण खंडपीठाने नोंदवले. मात्र, त्याचवेळी ‘इतर काही कंत्राटदारांना २०१८मध्ये कार्यादेश मिळूनही त्यांनी आपापल्या टप्प्यातील काम ६० ते ९० टक्के पूर्ण केले आहे. परंतु, एमईपी संजोस या कंत्राटदार कंपनीकडून महामार्गाच्या दोन टप्प्यांतील काम अवघे नऊ व १६ टक्के झाले आहे. त्यामुळे राज्य सरकारने या कंपनीला वेग वाढवण्यास सांगून आवश्यक कार्यवाही करावी’, अशी सूचना खंडपीठाने केली.

तत्पूर्वी, प्रकल्पाचे काम सुरू झाल्यापासून म्हणजेच २०१० ते एप्रिल-२०२१ या कालावधीत या महामार्गावर तब्बल दोन हजार ४४२ जणांचे मृत्यू झाल्याचे माहितीच्या अधिकारातील माहितीतून समोर आले आहे, असे अॅड. पेचकर यांनी सुनावणीदरम्यान न्यायालयाच्या निदर्शनास आणले.

‘वशिष्ठी’वरील पुलावरील धोके कमी करा

‘महामार्गावरील वशिष्ठी नदीवरील नव्या पुलाचे बांधकाम अद्याप पूर्ण व्हायचे आहे. परिणामी रात्रीच्या वेळी वाहनचालकांचा गोंधळ होऊ नये आणि अपघाताचा धोका कमी व्हावा यादृष्टीने योग्य सोयी तसेच चमकदार प्रकाशाचे (हायलाईटर) उपाय आवर्जून करावेत’, असेही खंडपीठाने राज्य सरकारला सांगितले.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here