जिल्हा आरोग्य विभागाच्या पीसीपीएनडीटी समितीची बैठक मार्च किंवा एप्रिल महिन्यात होण्याची शक्यता आहे. याच बैठकीत इंदोरीकर महाराज यांनी सादर केलेल्या लेखी खुलाशावर चर्चा होणार आहे. तोपर्यंत येणारे अन्य खुलासे आणि पुरावेही या बैठकीसमोर सादर करून नंतरच पुढील निर्णय होणार असल्याचे सांगण्यात आले.
इंदोरीकर महाराज यांनी केलेल्या वक्तव्यामुळे मोठा गदारोळ झाला आहे. या वक्तव्याची दखल घेऊन आरोग्य विभागाने त्यांना नोटीस बजावली होती. या नोटिशीस महाराजांनी लेखी उत्तर दिले. त्यानंतर या प्रकरणी ठोस पुरावे असल्याशिवाय पुढील कार्यवाही शक्य नसल्याचे जिल्हा शल्य चिकित्सक डॉ. प्रदीप मुरंबीकर यांनी सांगितले; मात्र, यावर निर्णय घेण्याचा अधिकार समितीला आहे. हा मुद्दा सुरूवातीला उपस्थित झाला तोही एका बैठकीमध्ये. बैठकीतील निर्णयानंतरच नोटीस पाठविण्याची प्रक्रिया झाली. त्यामुळे त्यावर आलेले उत्तर, अन्य पुरावे वगैरे पुन्हा समितीसमोरच मांडावे लागणार आहेत. त्यामध्ये यावर चर्चा होईल.’ डॉ. मुरंबीकर यांनी काल आलेला खुलासा समाधानकारक असू शकतो, असे म्हटले असले तरी यावर समितीच्या बैठकीत आणि कायद्याच्या चौकटीतच निर्णय घेतला जाऊ शकतो.
आणखी वाचा:
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
